Сулейман-Стальский райондин администрацияди Къ.-М.Агъасиеван гуьмбет цIийикIа туькIуьр хъувунва
“Лезги газетдин” 2017-йисан 20-апрелдиз акъатай 16-нумрада Райсудин Набиеван “Къадирлу жен, гуьзчивилик кутан” макъала чапнавай. Авторди ана ялавлу инкъилабчи Къази-Мегьамед Агъасиеваз Кьасумхуьрелай тахминан 3-3,5 км-дин винидихъ — Кьурагьиз хъфизвай рекьин къерехда эцигнавай гуьмбет акьалтIай пис гьалда авайди, адахъ садни гелкъвен тийизвайди, халкь патал чан къурбанд авур кьегьал хцин экуь къамат гъиляй-виляй вегьенвайди къейднавай. Сулейман-Стальский райондин руководстводи и кардиз фикир гудайдак, инкъилабчидин гуьмбет къайдадиз хкидайдак гьам авторди, гьамни “Лезги газетдин” редакцияди умудар кутунай.
Ингье 7-ноябрдиз, Сулейман-Стальский районда Октябрдин инкъилабдин 100 йисаз талукьарнавай серенжемрин сергьятра аваз, Къази-Мегьамед Агъасиеван гуьмбет ремонт авурдалай кьулухъ ачух хъувуниз бахшнавай мярекатни кьиле фена. Идакай “Лезги газетдиз” чи штатдик квачир мухбир Хазран Кьасумова хабар гана.
Лишанлу карда райондин кьил Нариман Абдулмуталибова, администрациядин жавабдар къуллугъчийри, партиядин ветеранри ва гзаф кьадар масабуру иштиракна. Россиядин социал-демократвилин рабочий партиядин член хьайи Къази-Мегьамед Агъасиеван цIийикIа туькIуьр хъувунвай гуьмбетдал жавабдар ксар Кьасумхуьруьн 2-нумрадин юкьван школадин аялри, цуьквер вугуналди, къаршиламишна.
Лагьана кIанда, Сулейман-Стальский райондин администрацияди цIийикIа туькIуьр хъувунвай гуьмбетдин чин пад рекьихъ элкъуьрнава, ана инкъилабчидин шикил тунва, адан кIаникай “Агасиев Казимагомед — пламенный революционер. Расстрелян здесь буржуазными националистами в октябре 1918 г.” гафар кхьенва.
Лезги халкьдин тарихда кьетIен гел тунвай векилрин ирсинив, экуь къаматрив къадирлувилелди, къайгъударвилелди эгечIзавай гьар садаз аферин! Къ.-М.Агъасиеван гуьмбет цIийикIа арадал хкуни Сулейман-Стальский районда и месэладиз еке фикир гузвайди мад сеферда субутна.
«Лезги газет»
