9-майдиз Америкадин Лас-Вегас шегьерда Америкада машгьур тир NABF ва USBA тешкилатрин чемпионвилин чlулар къачунин кьилин бягьс кьиле фена. Идан гьакъиндай Лезги газетдиз» LezgiSport.com чешмеди хабар гузва.
Чешмеди кхьизвайвал, чемпионвилин чlуларин сагьиб тарихда сифте яз лезги боксер Максим Дадашев хьана. Кьилин бягьсина ада Колумбиядай тир Дарлей Перез кlурарик вегьена.
27 йисан яшда авай, 63,5 килограммдин заланвиляй бягьсер тухузвай Максима Дарлеян винел 10-раундда техникадин нокаутдалди гъалибвал къачуна.
Максим Дадашевахъ, санлай къачурла, 11 гъалибвал ава, абурукай 10 гъалибвал нокаутдалди къачунвайбур я. Ам са бягьсинани магълуб хьанвач. Къуй адахъ инлай кьулухъни анжах гъалибвилер хьурай!
«Лезги газет»
