Мукьвара Россиядин Президент В.Путина 2004-йисан 11-майдилай 2017-йисан 30-июндалди дидедиз хьанвай гьар са аялдиз са сеферда 10 агъзур манат пул гуникай малумарнай. Идахъ галаз алакъалу яз редакциядиз гзаф кьадар кагъазар ва зенгер атана. Агьалийри и пулар къачуниз талукь яз жуьреба-жуьре суалар гузва. Гзафбуру “Гьихьтин документар лазим я?” лугьуз, хабар кьазва. Чна Россиядин Пенсийрин фондунин Дагъустанда авай отделенидин пресс-къуллугъдин регьбер Альбина Сункъулиевадивай и месэладиз талукь са жерге суалриз жаваб гун тIалабна. Ингье ада чаз гъиле-гъилди гайи жавабар…
10 агъзур манат пул къачун патал арзаяр алай йисан 1-октябрдалди кьабулда. Арзаярни “Госкъуллугъар” порталдин куьмекдалди гуз жеда. Пул анжах РФ-дин мулкара яшамиш жезвай чи уьлкведин ватандашриз гуда. Аялдизни РФ-дин гражданство хьун герек я. Эгер хизанда 3-далай 16 йисал къведалди яшда авай са шумуд аял аватIа, арзада гьар са аялдикай делилар къалурна кIанда.
Арза сада — я дидеди, я бубади, гьакIни хвавиле ва я рушвиле кьабулнавай дидеди ва я бубади гуда. Ам ацIурун патал аял хунин гьакъиндай гузвай шагьадатнама, банкдин счётдин делилар, арза гузвай касдин паспорт, СНИЛС лазим къведа. Эгер квехъ аял хунин гьакъиндай РФ-дин ЗАГС-дин органди ганвай шагьадатнама авачтIа, квевай Россиядин Пенсийрин Фондунин муьштерийрихъ галаз кIвалахдай къуллугъдиз зенгна чириз жеда. Банкдин счётдин реквизитар, БИК ва корреспондентский счётдин нумра къалурун лазим я.
Дикъет це! Гзафбуру банкдин картадин винел патал алай нумра къалурзава. Им дуьз туш. Арзада банкдин счётдин 20 рекъемдикай ибарат тир нумра къалурун герек я. Имни интернет-банкдикай менфят къачуна чириз жеда.
Маса документар галкIурун герек туш. Пул маса касдин счётдиз ракъурзавач. Ам анжах арзада къалурнавай касдин картадиз хкведа.
Пул гунин гьакъиндай къарар Россиядин Пенсийрин Фондунин Дагъустанда авай отделениди (ОПФР) арза кьабулайдалай кьулухъ кIвалахдин 5 йикъан вахтунда кьабулда. Ам кьабулуникай квевай “Госкъуллугъар” порталда, хсуси кабинетда чириз жеда.
Пул тагунин себебрик акатзава:
— аял винидихъ къалурнавай яшарик акат тавун;
— аялдин гьакъиндай диде-бубавилин ихтияррикай магьрумарун ва я абур сергьятламишун;
— пул гун патал арзада къалурнавай аял кьенвайди яз хьун;
— арзада къалурнавай делилар дуьм-дуьзбур тахьун.
Са сеферда гудай пул 2020-йисан 1-июндилай кьулухъ арзада къалурнавай картадиз хкведа.
И месэладин патахъай маса суалар пайда хьайитIа, агьалийривай абур пенсийрин фондуниз атана чириз жеда. Алай вахтунда арадал атанвай эпидгьалар фикирда кьуналди, ОПФР-дин РД-да авай отделениди кIвалах Интернетдай виликамаз нубат кьуналди кьилиз акъудзава.
Рагнеда Рамалданова
