Медицинадин страхованидин рекьяй ВТБ ООО-дин Дагъустанда авай филиалди ОМС-дин къурулушда, страховатнавай ксарин ихтиярар хуьнихъ галаз алакъалу яз ва ЧIехи Гъалибвал къазанмишна 74 йис тамам хьунин сергьятра аваз, ВОВ-дин инвалидрихъ ва иштиракчийрихъ галаз кIвалах тухвана. Филиалдиз медицинадин идарайрай ВОВ-дин кьилди-кьилди тIварар кхьенвай сиягьар агакьарнавай. Абур дяведин иштиракчийрин Вирироссиядин общественный тешкилатдин РД-да авай региональный отделенидани Дагъустандин зегьметдин ва яшайишдин рекьяй вилик тухудай министерствода дуьз ятIа ахтармишна.
Къенин юкъуз чи республикада Ватандин ЧIехи дяведин инвалидар ва иштиракчияр тир 123 кас ама. Абурукай 27 ва абурув барабарнавай, чеб Махачкъалада яшамиш жезвай ва шегьердин поликлиникайра учётда авай 30 касни филиалда страховатнава. ВОВ-дин 27 инвалиддикайни иштиракчийрикай 6 Махачкъаладин поликлиникайра учётда ава. Амай 21 кас республикадин маса шегьерра ва районра яшамиш жезва, абур анра медицинадин идарайрихъ галкIурнава. Анра абурун диспансеризация кьиле тухун патал планар туькIуьрнава, гьар вацра участковый духтурри, гьар зур йисан вахтунда пешекаррини, лазим атайла, яшамиш жезвай чкадиз фенани, абурун гьал вири патарихъай ахтармишзава.
ИкI, мукьвара филиалдин къуллугъчийри ВОВ-дин 27 инвалиддиз ва иштиракчидиз телефондай зенгна, абурун гьал чирна, лазим атай дуьшуьшра 15 касдин патав кIвале медицинадин къуллугъар кьилиз акъудун ва абур дарманралди таъминарун патал серенжемар кьабулна. Кьилди къачуртIа, Дагъустандин Огни шегьердиз — Н.М.Агъамирзоеван (1926-йисуз дидедиз хьанвай), Ахцегь райондин КьакIаз-Н.А.Исмаилован (1922-йисуз дидедиз хьанвай), Рутул райондин Кичерин хуьруьз — Г.А.Къурбанован (1920-йисуз дидедиз хьайи), Табасаран райондин Дарвагъиз — А.Б.Алиеван (1922-йисуз дидедиз хьанвай) ва масабурун кьилив фена. Абуруз къуллугъзавай гьалдин ва дарманралди таъмиранунин жигьетдай наразивилер авачир. Идалайни гъейри, ВОВ — дин инвалидрин ва иштиракчийрин хизанрин векилри филиалдиз зенгер ийиз, и жуьреда фикир гунай (кьилди къачуртIа, КьакIай — Исмаиловрин, Дарвагъай — Алиеврин) хизанри, сагърай лагьана.
Къейд авун лазим я хьи, филиалда ВОВ-дин гьар са инвалиддин ва иштиракчидин тIварцIихъ махсус паспорт ачухнава. Гележегда диспансеризация тухунин ва, адан нетижайрал асаслу яз, сагъламардай, азаррин вилик пад кьадай серенжемар кьиле тухунал гуьзчивалда.
Мегьамед Гьамзатов
