Чи уьлкведин агьалийри и йикъара Ватандин ЧIехи дяве  къарагъайдалай инихъ 80 йис тамам хьунин ва РикIел хуьнинни гъамлувилин югъ къейдна. Хажалатдин вакъиадиз талукь мярекатар чи республикадани кьиле фена. Абурукай сад “Санал женг чIугуна ва санал гъалибни хьана” лишандик кваз РД-дин милли сиясатдин ва диндин крарин рекьяй министерстводи “Дуствилин кIва­лин” вилик  квай майдандал тешкилнавай.

Мярекатда министерстводин къуллугъчийри, дяведин, зегьметдин, къайдаяр хуьдай органрин ветеранри, жегьил­ несилдин векилри, волонтерри ва журна­листри иштиракна. КIватI хьанвайбуру дя­ведин йисарин манийрихъ, музыка­дихъ яб акална. Мярекат “Душмандин ху­руз къарагъ, уьлкве” манидин музыка­дин сесерик кваз ачухна. Анал рахай РД-дин милли сиясатдин ва диндин крарин рекьяй министр Энрик Муслимова лагьана­:

— Чна гьар йисуз 22-июндин югъ хажа­латдин, гъамлувилин гьиссер рикIе­ваз акъудзава. ГьикI лагьайтIа, 1941-йисан 22-июндиз Гитлер кьиле акъвазнавай фа­шистрин Германиядин кьушунар хабарсуз Советрин Союздин мулкариз гьахьна. Душмандин вилик пад кьаз, адахъ галаз женг чIугваз Советрин Союз­дин вири халкьар къарагъна, Яру Армиядин кьушунрихъ галаз санал фашистар дарбадагъна. Зурба магьрумвилериз, четинвилериз дурум гана, Гъалибвал къазанмишна. Къе Советрин Союз амачтIани, виликан Союздин республикайрикай кьилдин государствояр хьан­ва­тIани, чи тарихни, чи гъамлувални, Гъа­­либвални вириданди я. Фашистри агъзурралди шегьерарни хуьрер, карханаярни майишатар барбатIнатIани, гзаф кьадар агьалияр Германиядиз тух­вана­тIани, женгера ва лагерра 27 миллиондилай виниз инсанар телеф хьана­тIани, абурулай чпин мурдар мурадар кьилиз акъудиз алакьнач. Къе чна дяведин йисара телеф хьайибурни, гел га­лачиз квахьайбурни, далу пата гьакъи­сагъвилел­ди зегьмет чIугур­бур­ни ри­кIел хкизва.

Генерал-майор, профессор Герман Кириленкодин рахунарни таъсирлубур хьана. “Зун Каспийск шегьердай я. Дяведив гатIунайла, зи вад йис тир. Зи дах гьа пакадин юкъуз Махачкъаладин военкоматдиз фенай. Ада Сталинград патал женгера чан гана. Дяведин нетижаяр пара заланбур я. Советрин Союздин агьалийрин 30 процент телеф хьана. Да­гъус­тан­дай фронтдиз фейибурун 46 процент, Кас­пийск шегьердай женгера иштиракайбурун 86 процент элкъвена хтанач. Ихь­тин­ крар ва рекъемар чна рикIе­лай ракъурна виже къведач. Чи ве­лед­риз мад ахьтин мусибатар такурай” — ла­гьана генералди.

Мярекатдал республикадин ветеранрин Советдин председатель Магьарам Алижанов, дяведин йисарин аялрикай тир Гьабибат Азизова ва масабур рахана. Манидарар тир  Мадлен Татурбиевади, Айшат Айсаевади ва Муксин Камалова дяведин йисарин ва ватанпересвилин манияр лагьана.

Нариман  Ибрагьимов