Теяра Велиметова. И тIвар «Лезги газетдин»  кIелчийриз  идалай  вилик­ни газетра адакай вичикай, адан ктаб­рикай акъатай макъалайри, адан къелемдикай хкатай шиирри малумарнава. Кьилди къачуртIа, СВО-да кьегьалвилелди телеф хьайи Радик Нагъметуллаеваз, Мегьамед Мурадоваз бахшна кхьей адан шиирар газетдин чинриз акъатнай.

Москвадин областдин Видное шегьерда яшамиш жезвай, урус чIалалди гьикаятдин эсерар теснифзавай лезги писатель, РФ-дин писателрин Союздин член, «Московиядин къизилдин къелем» тIварцIин сагьиб, са шумуд премиядин лауреат Теяра Велиметовадихъ Москвадин къелемчийрин арадани гьуьрмет ва нуфуз хьанва.

Чи девирдин лап тIал алай месэлайри къалабулух кутазвай къелемчиди икьван чIавалди «Долгая любовь моя», «Узники Азазеля» ва маса ктабар (романар) урус чIалалди чапнава. Тажуб жедай кар туш, инал тIвар кьунвай кьвед лагьай роман Россиядин Игит Зейнудин Батмановаз бахшнава.

Заз Теяра Агъаметовна жемиятдин кIвалахрин кIвенкIве авай иштиракчи тирдини къейд ийиз кIанзава. Россиядин дишегьлийрин Союздин Видное шегьердин отделенидиз регьбервал гузвай Елена Ястребовади текшилзавай кIвалахрик Т.Велиметовади вичин пайни кутазва: абуру СВО-да иштиракзавай чи аскерриз куьмек гузва, парталар, маскировочный сетар гьазурзава, мергьяматлувилин куьмек гьафтеда кьве сеферда Луганскдив агакьарзава.

«Дяведин махсус серенжемда иштиракзавай кьегьалриз куьмек гунин макьсаддалди, дишегьлийрин Союздин членар яз, чна гьар сада жуван хиве са тайин­ кар тунва. Месела, сада улакь тешкилзава, масада – ада цадай бензин… Зи везифа аскерриз шоколадар кIватIун я. Гьафтеда кьве сеферда кьилиз акъуд­зава. Чаз къаюмвалзавай ксарни ава, гьа са вахтунда хсуси такьатарни харжзава», – ихтилатзава Теяра Агъа­метовнади.

Къейд ийин, Т.Велиметовади КцIара, Бакуда, Махачкъалада, Дербентда кьиле физвай чи халкьдин медениятдинни эдебиятдин мярекатра иштиракзава, къелемчийрихъ галаз сих алакъаяр хуьзва. Ада 2023-йисан эхирда Махачкъалада кьиле фейи лезги шииратдин ва шаир Седакъет Керимовадин юбилейдин мярекатдани иштиракна. Идалай вилик «Лезги газетдин» редакциядиз мугьман хьайила, чаз ада алай вахтунда яратмишунрин рекьяй гъиле кьунвай крарикай ихтилатна.

Малум хьайивал, алай вахтунда ада дишегьлийрин Союздин тIалабуналди кье­­гьал дишегьли тир Светлана Лабановадикай повесть кхьизва. Чаз адахъ вири крара, яратмишунра еке агалкьунар хьана кIанзава.

К.Ферзалиев