И йикъара Дагъларин уьлкведин вири шегьерра ва районра ЧIехи Гъалибвилин 77 йисаз талукьарнавай мярекатар кьиле тухузва. Апрелдин вацран эхиримжи юкъуз Каспийск шегьердин майдан вишералди инсанрив ацIанвай. Абурун арадай хуруйрал орденарни медалар алай дяведин, зегьметдин ветеранар, Георгиян лентер алкIурнавай РД-дин гьукуматдин членар, Каспийск шегьердин администрациядин къуллугъчияр, аскерар, кадетар, гъвечIи пайдахар, цуьквер гвай жегьилар аквазвай. Шегьерда Сергей Меликова кьил кутуналди тешкилнавай “Гъалибвилин Пайдах” мярекат кьиле физвай. Майдандал Гъалибвилин зурба пайдахди лепе гузвай. Ихьтин акцияр 10-майдалди республикадин саки вири шегьерра ва районра давамарда.
Мярекат ачухунихъ галаз сад хьиз, РД-дин Кьил Сергей Меликова Ватандин ЧIехи дяведин ва далу патан ветеранриз, Яракьлу Къуватрин аскерриз ва шегьерэгьлийриз 9-Майдиз къейддай Гъалибвилин 77 йисан сувар тебрикна.
— Гъалибвилин сувар чун патал са патахъай гъамлу ва гьакI шадвилин, дамахдин ва халкьдин сувар я,- лагьана Сергей Меликова.- Ам чи уьлкведин ва республикадин гьар са агьалидиз, хизандиз багьа я. ГьикI лагьайтIа, чна а мусибатдин дяведа фашистрихъ галаз женг чIугур, кьегьалвилер къалурай, чанар къурбанд авур ва гел галачиз квахьай вирибур рикIел хкизва. Абурун руьгь гьамиша чахъ галазва.
Чи халкьари Гъалибвал патал, чпин чанарни гьайиф татана, женг ва зегьмет чIугуна. Далу пата фронт патал вири крар авуна. Техилни гьасилна, яракьарни акъудна, Яру Армия аскерралдини, парталралдини таъминарна. Къе заз виридаз, юкь агъузна, икрамиз кIанзава.
1945-йисан 30-апрелдиз советрин аскерри Берлиндин рейхстагдин кукIушдал Гъалибвилин Яру Пайдах хкажнай. Чнани къе “Гъалибвилин Пайдах” акция кьиле тухузва, — лагьана С.Меликова. — Малум тирвал, Гъалибвилин сифте пайдах стрелковый 150-дивизияди хкажайди яз гьисабзава, ам Ватандин тарихдани гьатнава. Къе 150-дивизияди мад вичин гъалибвилин рехъ давамарзава — Украинада кьиле тухузвай махсус серенжемда. Заз кьетIендиз къейд ийиз кIанзава, и дивизияда хейлин дагъустанвийрини викIегьвилелди къуллугъзава. Абуру, Гъалибвилин Пайдахдин лепейрик кваз, чеб чи къагьриман бубайрин ва чIехи бубайрин уьтквем рухваяр тирди успатзава.
Гъалибвилин Пайдах чун патал гьамиша пакди я ва адахъ кьетIен метлеб ава. Ада чи Ватандин аслу туширвал, азадвал хвейи чIехи бубайрин игитвилер, дирибашвилер рикIел хкизва. И пайдахди чаз гьар са карда жавабдар ва намуслу хьуниз эверзава. За къе виридаз чи акциядик экечIуниз, тарихдин игитвилин чинриз вафалувал хуьзвайди къалуруниз, чи Гъалибвилин ярж тир Пайдахдиз гьуьрмет авуниз эверзава. Гъалибвилин пайдах чна инанмишвилелди чи къенин несилдив вугузва. Агъунва хьи, ада ам вилин нини хьиз хуьда ва гьар са карда Ватандихъ авай кIанивал къалурда. Украинада кьиле тухузвай махсус серенжемда иштиракзавай чи офицеррин ва аскеррин уьтквем крари идан гьакъиндай шагьидвалзава.
Москва, Сталинград, Ленинград патал кьиле фейи виридалайни къизгъин женгера дагъустанвийрини дирибашвилелди иштиракна,- давамарна С.Меликова.- Фронтдиз Дагъустандай 180 агъзур кас фена. Гзафбуру чпин кьегьалвилер партизанрин дестейра, Европадин уьлквеяр фашизмдикай азаддайла, къалурна. 1945-йисан 30-апрелдиз чи ватанэгьли Абулгьаким Исмаилова вичин женгинин юлдашарни галаз Гъалибвилин са пайдах кIватнавай рейхстагдин винел хкажна.
“Гьуьрметлу ва играми ветеранар, зун кIевелай агъунва, куьне хтулрал, птулрал дамахда, гьикI лагьайтIа, абурни гьа куьн хьтин Ватандал рикI алайбур, уьтквембур, дирибашбур жеда, куь баркаллу крар абуру давамарда”, — къейдна региондин Кьили.
Россиядин Игит Дибиргьажи Мегьамедова, Украинадин махсус серенжемда викIегьвилелди иштиракай танкист Марат Халикьова ва афгъанвийрин ветеранрин организацийрин советдин председатель Мегьамед Арипова Каспийск шегьердин майдандал Гъалибвилин Пайдах шад сесеривди хкажна.
Къейд ийин, Сергей Меликова старший сержант Марат Халикьован ва махсус серенжемда иштиракай сержант Ибрагьимхалил Гьажиеван дирибашвални къейдна. Кьведазни “Дагъустан Республикадин вилик лайихлувилерай” орденар гана.
Акьалтзавай несил патал и мярекатдихъ ва Гъалибвилин Пайдахдиз гьуьрмет авунихъ авай метлебдикай Дагъустандин дяведин ветеранрин Советдин председатель Магьарам Алижанова лагьана. “И йикъара вири уьлкве Гъалибвилин 77 йисаз гьазур жезва. Чун патал Гъалибвилин Пайдахдин роль лап зурбади я. Пайдахдин вилик чи аскерри Ватандиз вафалувилин кьин кьазва ва виридалайни чешнелу, дирибаш аскерри пайдахрал къаравулвал чIугвазва”.
“Гел жагъурзавайбур” дестедин командир Надия Ибрагьимовади, Юнармиядин векил Анастасия Арцовади акьалтзавай несилар чIехи бубайрин крариз вафалу жедайдакай, Гъалибвилин Пайдахдин метлеб квадар тийидайдакай лагьана.
Хийир Эмиров
