19-апрелдиз Дагъустан Республикадин Кьил Сергей Меликова РД-дин Халкьдин Собранидиз вичин Чар кIелна. Мярекат Дуствилин кIвале кьиле фена. Иштиракчийрин арада Федеральный Собранидин векилар, республикадин гьукумдин ва муниципальный органрин, федеральный къурулушрин, карханайрин руководителар, образованидин, илимдин, культурадин, спортдин деятелар, агъсакъалар ва жегьилар авай. ЦIи региондин Кьилин Чар Парламентдин сессиядал кIелнач. И мярекат кьилдин зурба вакъиа хьиз кьиле тухвана.

Республикадин Кьили гъавурда тур­вал,­ и кар чиз-чиз авурди я. “Чи общест­во­диз садрани тахьай хьтин къурхуяр гузвай шартIара чаз садвал, тупламишвал ва жуьрэтлувални кьетIивал герек я. И кар па­тал авунвай кIвалахриз, кьиле физвай гьалариз ачухдиз ва намуслувилелди къимет гана, чун пакадин йикъаз инанмишвилелди килигна кIанда”, — лагьана С.Меликова.

Республикадин Кьили регионда арадал атанвай сиясатдин, экономикадин, яша­йишдин гьалариз дуьзгуьн къимет гана. Ада гьукуматдин федеральный, рес­пуб­ликадин органрин, жемиятдин, общественный организацийрин, агъсакъалрин, же­гьил­рин куьмекни галаз авунвай кIва­лах­рин гьахъ-гьисаб авуна ва республикадин вилик акъвазнавай важиблу везифаяр ачухарна, жуьреба-жуьре къурулушри, минис­терствойри, ведомствойри, муниципалитетри рехъ гузвай ва кIвала­хар кьулухъ язавай гъалатIрикай ачухдиз лагьана.

“Дагъустанвийри чеб баркаллу бубайрин рехъ лайихлувилелди давамарзавай кьегьалар тирди краралди къалурна. Махсус серенжемда иштиракзавай вад агъзурдав агакьна дагъустанвияр женгинин орденралди ва медалралди къейднава.

Эхиримжи йисуз  уьлкве вичин азадвал ва аслу туширвал яракь гъилеваз хуь­­низ мажбур хьанва. Дамах ийиз жедай­ кар ам я хьи, дуьньядин метлеб авай и зур­ба вакъиайра, са рахунни алач, абуру­­кай тарихдин учебникра кхьида, мад се­ферда дирибашвал, уьтквемвал къалурзавай Дагъустандин кьегьалри дуьнья­диз аквадайвал нур гана”, — къейд­на С.Меликова.

Дагъустандин Кьили военный махсус серенжемда иштиракзавай, гьакIни Россиядин Игит лагьай тIварцIиз лайихлу хьанвай ксарин тIварар кьуна: Нурмегьамед Гьажимегьамедов, Эседулла Абачев, Энвер Набиев, Руслан Къурбанов, Исрафил Мегьамедов, Михаил Абрамченко, Шамил Мегьамедов.

— Гьайиф хьи, бязи вахтара хсуси уьмуьр игитвал авун патал къурбанд ийиз­ва. Чна Ватандин азадвал ва аслу туширвал патал женгера телеф хьайи виридан гьакъиндай яс чIугвазва, — лагьа­на Сергей Меликова ва са декьикьада кисун малумарна.

Дагъустан уьлкведа кьиле физвай ва­къиайривай къерех хьанвач. Фронтдиз куьмек гун патал республикади тупламишвал ва жуьрэтлувал къалурзава. Мах­сус серенжем кьиле физвай чкайриз да­гъустанвийри гуманитарный 5180 тонн парар рекье тунва. Пуд агъзур тонндилай виниз парар диндин объединенийри ва мергьяматлувилин фондарини рекье ту­на. И рекъем, уьлкведин регионрив гекъи­гайла, виридалайни екеди я.

Вичин рахунра Сергей Меликова гьар юкъуз фикир гана кIанзавай пуд месэладал кIватI хьанвайбурун фикир желбна. Сифте нубатда им промышленностдиз, хуьруьн майишатдиз ва са жерге маса хилериз талукь я. Уьлкведин майданда, гежел тевгьена, ишлемишна кIанзавай са жерге механизмаяр арадал гъанва. Абурукай чнани менфят къачун лазим я.

Региондин индустрияди Россиядин лап чIехи компанийрихъ галаз кооперациядин алакъаяр мягькемарун важиблу я. Ида Дагъустандин карханайриз производстводин кьадарар артухардай, им­порт­дин шейэр жуванбуралди эвездай, кIвалахдиз кьецI гузвай са бязи крарикай азад жедай мумкинвал гуда.

Республикада чилин месэлани кар алайди я. Региондин Кьилин гафаралди, са патахъай, республикада чил тIимил ава, муькуь патахъай, агъзурралди гекта­рар ерли ишлемишзавач. Республикадин гьукуматди ва муниципалитетри чпин ихтиярда авай чилер менфятлувилелди ишлемишун патал герек серенжемар кьабулун лазим я.

“Чилини эменниди халкьдин ва государстводин хушбахтвал, девлет патал кIва­лахна кIанда. И карни чалай, абур менфятлудаказ ишлемишайла, алакьда”, — лагьана С.Меликова.

Вичин рахунра республикадин Кьили государстводин ва муниципалитетрин эменни кирида ишлемишунай аламай буржар вахчунин важиблувал къейдна. Идалайни гъейри, эцигна куьтягь тавунвай объектрал, хсуси сектордин такьатарни желб авуна, менфятлувилелди кIва­лах­­дай механизмаяр туькIуьрунин игьтияж арадал атанвайдакайни лагьана.

ЦIинин йисуз Дагъустанда аялрин 24 бахча, 13 школа ачухда, 141 дарамат капитальнидаказ ремонтда. Сергей Меликова кIватI хьанвайбурун фикир менфятлу­ проектар уьмуьрдиз кечирмишунал гьар йикъан гуьзчивал авун тапшурмишна.

Хийир Эмиров