Фикирар ва зендер
Дагъустандин Кьил Сергей Меликова республикадин Халкьдин Собранидиз рекье тунвай Чарчин гьакъиндай сиясатчийри, жемиятдин векилри, жуьреба-жуьре министерствойринни ведомствойрин регьберри, шегьеррин ва районрин администрацийрин кьилери, депутатри, алимри ва гзаф масабуру чпин фикирар лагьана. Абурукай бязибур чна газет кIелзавайбуруз теклифзава.
Юрий Гьамзатов, РД-дин рекъемрин рекьяй вилик финин министр:
“Дагъустандин Кьил Сергей Меликован Чар гегьеншди хьана лагьайтIа, зун гъалатI жедач. Ана яшайишдин жуьреба-жуьре хилериз фикир ганва. Гьа жергедай яз, республика рекъемрин рекьяй вилик финизни.
Къейд ийин хьи, алай вахтунда республикада кардик квай хейлин идарайра документар электронный къайдада гьазурзава. И карди анра кIвалахзавайбурун пар кьезиларнава. Гьа са вахтунда тайин са документ къачун патал агьалияр, нубатар кьаз, вил алаз акъваззавач. И месэла са легьзеда гьялна акьалтIарзава.
Республикадин Кьили чи вилик эцигнавай месэлайрик дагълух районар хъсан еридин, йигинвал авай интернетдалди таъминарун акатзава. И жигьетдай рекъемрин рекьяй вилик финин министерстводи кIвалах кьиле тухузва. ЦIи, махсус программадин сергьятра аваз сифте нубатда туризмдин объектар авай хуьрерив интернетни мобильный алакъа агакьда.
Сергей Меликова вичин Чарче алай йисуз Дагъустанда къецепатан са десте уьлквейрин иштиракчивални аваз рекъемрин международный форум кьиле фидайдакай хабар гана. Зи фикирдалди, ам тежриба артухарунин, цIийи чирвилер къачунин рекьяй кутугай майдандиз элкъведа”.
«Лезги газет»
