И йикъара “Лезги газетдин” редакциядиз Мегьарамдхуьруьн райондин Ярагъ-Къазмайрин хуьряй тир агъсакъал, машгьур экономист Гьажибуба Рустамовалай чар атана. Вичин яшар 82 йисалай алатнавай 2-группадин инвалид, РД-дин лайихлу экономист Гьажибуба Шихмурадовичан наразивал райондин агьалийрал ишлемишнавай газдай илитIнавай гьакъикъибур тушир буржарихъ галаз алакъалу я. Адан чар чна агъадихъ чапзава.
“2019-йисан 11-январдиз зав “Газпром межрегионгаз Республики Дагестан” ООО-дин Мегьарамдхуьруьн районда авай управленидай газ ишлемишунай зал 13 538,82 манат бурж хьанвайдакай хабар гузвай чар агакьна. И чарчел за газдин гьакъи ганвай вахтар къалурнавай, амма, дикъетдивди ахтармишайла малум хьайивал, ана вири дуьшуьшар къалурнавачиз хьана. ИкI, ина “Газпром межрегионгаз Республики Дагестан” компаниядин счетдиз за Мегьарамдхуьруьн почтамптдай 2018-йисан 9-ноябрдиз, 8-декабрдиз ва 2019-йисан 11-январдиз рекье тур пулар, вири санлай 11 490 манат авачир. Идалайни гъейри, зав агакьарнавай малуматда ишлемишнавай газдин кьадар къалурзавай делилар авачиз, яни квяй ятIа къалур тавуна, и ва я маса варцарихъ галкIурнавай кьадар пуларни къалурнава: 2018-йисан 1-январь — 3455,42 манат, 4-апрель -2708,18 манат ва 1-сентябрь — 2318,65 манат. Вири санлай — 8482,25 манат.
Малум жезвайвал, кьве къайда ишлемишунин нетижада межрегионгаз компанияди завай 19972,25 манат къакъудзава. Мегьарамдхуьруьн райгаздин къуллугъчийривай зун винидихъ гъанвай делилрин, яни пул чуьнуьхунин себебрин гъавурда тваз хьанач. Абуру лугьузвайвал, Дагъустан Республикада абонентрихъ галаз гьахъ-гьисабар ийидай кархана агална, сифтедай Пятигорскдиз, ахпа Сибирдин са гьиниз ятIани хутахнава.
Буржар хьунин гьакъиндай хквезвай малуматдин чарарик дегишвилер кутаз, агьалийри гузвай гьакъийрин делилар кхьиз ва, квитанциядал асаслу хьана, “цавай къачунвай” тапан буржар алудиз идарадин къуллугъчийривай жезвач, абуруз гуя ихьтин ихтияр авач.
Гьа ихьтин гьалда неинки тек са зун, гьакI райондин, гьатта республикадин маса агьалиярни ава. Къалп счетрал бинеламиш хьана, руководителдин ва кьилин бухгалтердин къулар алачиз, ишлемишнавай газдай миллиард манатралди пулар агьалийрал илитIзава, ахпа абур чуьнуьхзава. РД-да авай кархана агална, ахпа Пятигорскда ачухна, адалайни кьулухъ мад са гьиниз ятIани хутахна — нетижада Дагъустандин агьалийри гузвай нагъд пулар михьиз квахьнава. Республикадин агьалийри газдин пул вахт-вахтунда гузва, амма абур малуматрин чарарив агакьзавач. ГьикI агакьда кьван – абур межрегионгаздин и мукьвара кьунвай руководителдив гваз хьанва.
Агьалияр лагьайтIа, Дагъустандин почтадин конторади ганвай квитанцияр, тапан буржар кхьенвай малуматдин чарар гваз идарайрин са кабинетдай масадаз физ-экъечIзава, алачир буржар сакIани терг ийиз жезвач.
Гьаниз килигна за тIалабзава:
1.Дагъустандин тIебии газ ишлемишзавай вири агьалийрин лицевой счетра авай делилар ахтармишин, абур гьакъикъибур яни-тушни тайинарин ва Газпромдин тапан буржар терг ийин. Угърияр жавабдарвилиз чIугун лазим я.
2.Дагъустан Республикада ришветбазвилел, газдалди, электроэнергиядалди таъминарунин ва рекьер туькIуьрунин хилера ийизвай чуьнуьхунрал эхир эцигин”.
Гьа и манадин чарар Гьажибуба Рустамова Мегьарамдхуьруьн райондин ва Дагъустан Республикадин прокуратурайризни, РД-дин Кьилин ва Гьукуматдин Администрациядизни рекье тунва. Месэла, дугъриданни, тIал алайди ва республикадин вири жемятдиз талукьди я. Гьаниз килигна, Гьажибуба Шихмурадовича гьисабзавайвал, ам гьялунин рекье вири сад хьана, гражданвилин ихтияррал бинеламиш яз, гьахълувал субутарна кIанда.
Жасмина Саидова
