2025-йисан 2-июлдилай Россель­хоз­над­зордин Дагъустан Республикада­ авай уп­равлениди  уьзуьмлухар гьи­сабдиз къачунин кIвалах (инвента­ризация) башла­мишда, хабар гузва идарадин пресс-къуллугъди.

И серенжемдин макьсад уьзуьм­лухрин­ федеральный реестрда къалурнавай делилар, чкайрал ахтармишунин нетижада абурун гьакъикъи кьадардив гекъигун я. Хабар гузвайвал, Россельхознадзордин Дагъустан Рес­публикада авай управлениди гьар са ци­пицIлух кьве йисалай са сеферда ахтармишда, ида уьзуьмлухрин хилез талукь делилар гьакъикъибур яз хуьн таъминардай мумкинвал гуда. Ивентаризация кьиле тухунин къайда РФ-дин хуьруьн майишатдин министерстводин буйругъдалди тестикьарнава.

Къейд ийин хьи, республикадин­ хуь­руьн майишатдин зегьметчийри­ гьар йисуз тахминан 1,5 гектардин чи­ле­ра ракъинин кагьрабаяр цазва. 2024-йисан сифте кьилин делилралди­, Да­гъус­тандин мулкунал бегьердал атан­вай уьзуьмлухрин кьадар 23,4 агъ­зур гектардиз барабар тир. Гьа са вахтун­да алатай йисан эхирдалди абурун­ умуми­ майдан 28,3 агъзур гектардив агакьун­ лазим тир. И хел виликди тухунин стратегияда къалурнавайвал, 2035-йис алукь­­далди республикада уьзуьмлухар цанвай мулкар 34,5 агъзур гектардив агакьдалди гегьеншарун ва абурукай бегьердал атанвайбурун кьадар 31,5 агъзур гектардиз барабар хьун лазим я.

Алай вахтунда регионди  ципицIрин жигьетдай хсуси игьтияжар тамамарзава. Гьасилзавай бегьердин асул пай  гьялун патал чехир хкудзавай заводриз рекье твазва. Идалайни гъейри, недай­ сортарин ципицIар Россиядин маса,  гьа жергедай яз Кеферпатан регионрин базарризни рекье твазва.

Амина Муслимова