Республикада кьетIендаказ хуьзвай мул­кар государстводин гьисабдиз къачунин­ кIва­лах давам жезва. Къенин йикъалди ихьтин 56 чкадикай 53 мулк Государстводин юзан тийидай эменнидин сад тир сиягьдик (ЕГРН) кутунва, хабар гузва РД-дин чилерин ва эменнидин алакъайрай министерстводи.

Гъавурда твазвайвал, и камуни гьукумдин органриз кьетIендаказ хуьзвай мулкара чинеба ийизвай крарин, гьа гьисабдай яз законсуз эцигунрин, анра авай ресурсар ишлемишунин вилик пад нетижалудаказ кьаз куьмекда. ЕГРН-да регистрация авунин кIвалах «Гегьенш делилрин милли къурулуш» программадин сергьятра аваз ва Дагъустан Республикадин Гьукуматдин къаюмвилик кваз  идарайрин векилрин уртах дестеди тамамарзава.

Республикадин вице-премьер Заур­ Эминова хабар гайивал, сиягьдик делилар­ кутуни рехъ гузвай тахсиркарвилерихъ га­лаз женг чIугун ва тIебиат хуьнин хиле­ къайда таъминарун патал законлу бине арадал гъизва. Ида гьукумдин органриз кье­тIен­да­каз хуьзвай чилер ишлемишунал гуьзчивалдай мумкинвилер гегьеншарзава.

Амина Муслимова