Алатай йисан 19-декабрдиз бажарагълу композитор, РФ-дин искусствойрин лайихлу деятель, вич неинки лезги халкьдин, гьатта вири Дагъустандин музыкадин зурба дестекрикай сад хьайи Мегьамед Азизханович Гьуьсейнов чи арадай акъатна. Гьайиф устад.
Мегьамед Азизханович гьина ва мус ханатIа, ада вичин уьмуьрда Дагъустандин музыкадин культура патал гьикьван кIвалахар авунатIа ва вичелай гуьгъуьниз гьихьтин ирс тунатIа, заз чиз, инал лугьун лазим къвезвач. Композитордикай вири делилар икьван чIавалди чи республикадин СМИ-ра, ктабра, журналра ганва.
За и макъала кхьинин себеб, винидихъ къейд авунвайвал, бажарагълу композитордин уьмуьрдикай ихтилат авун туш. Заз зун Мегьамед Азизхановичахъ галаз гьикI гуьруьшмиш хьанатIа, ада заз гьихьтин куьмек ганатIа ва адан насигьатри заз гьихьтин таъсир авунатIа, гьадакай ихтилат ийиз кIанзава.
Алатай йисан сентябрдин вацра за рагьметлу композитор Сейфуллагь Керимовакай ктаб кхьин патал материалар кIватIиз башламишна. Делилар кIватIдай фикир аваз зун Дербентда ва Махачкъалада гзаф ктабар ва газетар гъилелай авуниз мажбур хьана. Гьа икI са сеферда зун делилрин гуьгъуьниз Дербентдин музучилищедин директор Камилла Гьажимурадовна Магьмудовадин патав фейила, ада заз рагьметлу Мегьамед Азизхановичаз зенг авун меслят къалурна ва заз адавай гзаф къиметлу делилар жагъидайдакай лагьана. Жув студент тир чIавуз са шумудра акунвайтIани, мукьувай таниш тушир касдиз гьикI зенг ийида, ам закай инжиклу жедачни лагьана, суал гайила, Камилла Магьмудовади адаз вичи зенг авуна ва абурун арада, салам-калам хьайидалай кьулухъ, ихьтин суьгьбет кьиле фена:
— Мегьамед Азизханович, зи студентрикай сад музыкадин рекьяй ктабар кхьинал машгъул я. Адаз Сейфуллагь Керимовакай ктаб кхьиз кIанзава. Квевай жез хьайитIа, за адаз са куьмек гун тIалабзава.
— Ада ийизвайди лап хъсан кар я, чан руш, захъ галаз телефондин зенгинал алаз хьурай. Заз чизвай делилрикай гьихьтин менфят къачуз кIан хьайитIани, зун а карда адаз куьмек гуз шад я.
И гафарин ван хьайи зак ахьтин лувар акатна хьи, на лугьуди, зун гьасятда ирид лагьай цаварал акъатна. Гьа и йикъалай гуьгъуьниз зун бажарагълу композитордихъ галаз датIана телефондин зенгинал алаз хьана. Жуван кIвалахдин патахъай чи республикадин меркездиз фейила, зун адахъ галаз са шумудра гуьруьшмишни хьана. Гьа ихьтин гуьруьшрикай сада за адаз Махачкъаладин Р.Гьамзатован тIварунихъ галай милли ктабханади зи ктабрин презентация тешкилзавайдакай ва заз вич аниз атана кIанзавайдакай хабарна.
— Гьелбетда, чан хва, зун аниз къвенни ийида, экъечIна трибунадихъ ви ктабрин патахъай кьве гафни рахада, — лагьанай заз рагьметлуда.
Адахъ галаз хьайи гуьруьшмишвилерай, суьгьбет-рахунрай, меслятчи яз вич кьиле тухунай заз акуна хьи, Мегьамед Азизханович, дугъриданни, чIехи тIвараринни шабагьрин, машгьур ва кIвалахдин рекьяй чIехи дережадин къуллугъчи тиртIани, ада вичин инсанвилин дережаяр кIусни квадарнавачир. Са тIимил кьван вахтунда тиртIани адахъ галаз танишвал тухвай бередин таъсирлувал фикирда кьуртIа, завай кIусни ягъалмиш тахьана лугьуз жеда хьи, Мегьамед Азизханович инсандин гъавурда акьур, жегьил несилдиз насигьатчи хьайи, халкьдин культура патал уьмуьрлух зегьмет чIугур ва чи музыкадин рехъ нурлу авур гъетрез ухшар инсан тир.
Коронавирусдин тIугъвал себеб яз, зи презентация кьулухъ янай. За милли ктабханадин къуллугъчидивай хабар кьурла, ада заз гьукуматди мярекатар тухун ихтияр гун кумазди чпи зи ктабрин презентация тухуда лагьана, гаф ганай. Чаз аквазвайвал, къенин юкъузни ахьтин ихтиярар гьукуматди бегьемвилелди ганвач. Зун хьиз а йикъал вил алаз рагьметлу Мегьамед Азизхановични акъвазнавай. Гьайиф хьи, бажарагълу композитордиз а югъ кьисмет хьанач: залум тIугъвал тамамвилелди пуч жедалди ам вич чи арадай акъатна. Рагьмет хьурай вичиз!
Макъаладин эхирдай заз Мегьамед Азизханович Гьуьсейнован хизандиз, мукьва-кьилийриз ва вири лезги халкьдиз дериндай хажалат чIугуналди, башсагълугъвал гуз кIанзава. Бубайрин мисалда лугьузвайвал, инсан, несилрин рикIел аламай кьван гагьда, рекьидач. Мегьамед Азизханович Гьуьсейновни вичин гуьзел авазрани манийра эбеди яз яшамиш жеда.
Эдуард Ашурагъаев
