Ахцегьа, 1-нумрадин юкьван чирвилерин школадин спортдин цIийи майдандал,17-январдиз футболдай спортдин ветеранрин (40+) арада чIехи турнир кьиле фена. Ам Дагъустандин спортдин лайихлу къулугъчи, вичи яргъал йисара райадминистрациядин спорткомитетдин председателвиле кIвалахиз, жегьилрин арада массовый спорт вилик тухвай Аки Абдуризаеван экуь къаматдиз бахшнавай.
Акъажунрин спонсор, вичи Ахцегьа А.Гъаниеван тIварунихъ галай ДЮСШ-дин муаллим ва райондин “Ахцагь” командадин кьилин тренер Камил Гьажиеван гъилик вердишвилер къачур, алай вахтунда Россиядин 1-лигадин “Брянск” командада къугъвазвай бажарагълу футболист, жумарт меценат Мегьамед Алишев тир. Турнир тешкилунин ва кьиле тухунин месэлайра адаз вичин муаллимди, спортдин гьевескарар тир Гьажимурад Парпачева (акъажунрин кьилин судьявални гьада авуна), Арсен Асланбегова, Артём Мирзоева ва масабуру куьмекна.
Турнирди хъуьтIуьн и юкъуз (Аллагьдиз шукур, ам рагъ авай гуьлуьшанди хьана ва гьавиляй футболдал рикI алай пара ксар кIватI хьанвай) Ахцегьа Махачкъаладин “Кавказ”, Кьурагь райондин “Кьурагь”, гьакI чкадин “Ахцагь”, “Къурукал”, “Зрых” командаяр ва кьве вишелай артух тамашачияр кIватIнавай.
Итижлу къугъунрин нетижада гъалибвилин 1-чка Махачкъаладин “Кавказ” командади кьуна. 2 ва 3-чкаяр “Ахцагь” ва “Кьурагь” командайри пайна. Гъалиб хьайи командайриз махсус кубокар, талукь тир дережадин медалар ва “УКСМПИТ” МКУ -дин патай дипломар гана. Къугъунра тафаватлу хьайи кьилдин спортсменар, алава яз, “Лап хъсан варар хуьдайди”, “Лап хъсан бомбардир”, “Лап хъсан защитник” — махсус лишанралди къейдна. Турнир агалуниз талукь мярекатдал рахай ахцегьви Физули Исмаиловани хъсан къугъвай бязи футболистар вичин патай пулдин премийралди гьевесламишна.
Турнирдин иштиракчийриз спортдин сувар мубарак авуналди, муниципалитетдин УКСМПИТ-дин векил Айвар Насирова райондин кьиле авай ксарин патай и турнирдик кьил кутунвай ва спонсорвал авунвай ватанперес хва Мегьамед Алишеваз, акъажунрин вири иштиракчийриз чухсагъул малумарна. Вич Москвада яшамиш жезватIани, хайи ватандихъ рикI кузвай Мегьамед Алишеван, эхиримжи вахтунда районда спорт, кьилди къачуртIа, футбол вилик тухуниз кьетIен фикир гуналди, Ахцегьа, Хуьруьга, Цуругъа, Смугъула, Луткуна футболдин вижевай майданар арадал атун патал еке зегьметар чIугвазвай регьбер Осман Абдулкеримован тIварарихъ хуш келимаяр Ахцегь ДЮСШ-дин тренер, РД-дин ФК-дин лайихлу работник Фейруз Садыхова ва рахай маса юлдашрини лагьана. Вичин нубатда турнирдин “себебкар”, рагьметлу А.Б. Абдуризаеван хва Рауфа рагьметлу бубадин гьуьрметдай районда спортдин сувар тешкилай ва турнирда иштиракай вирибуруз рикIин сидкьидай сагърай лагьана.
Эхирдай чна Кьурагь райадминистрацияда спортдин ва жегьилрин сиясатдин рекьяй отделдин начальник, “Кьурагь” командадин векил, виликдай волейболдай Дагъустандин хкягъай командадин член Рамиз Рамазанован фикирни чирна.
— Ахцегьар чаз гьамиша гьар са карда чешне тир, гилани гьакI я. Спортдикай рахайтIа, ина жегьилар спортдал желбун патал девирдин истемишунрив кьур хъсан шартIар, дуьз рехъ къалуриз алакьдай спортдин ветеранар, рикI-руьгь авай аялар, спортдин месэлайриз кьетIен дикъет гузвай регьберар ва Мегьамед Алишев хьтин ватанперес рухваяр ава, абур сагърай! ГьакI тирвиляй 2020-йисуз «Ахцагь» командади (тренер — К.Гьажиев) Дагъустандин гьевескаррин ЛФЛ лигада 16 командадин арада — 6 республикадин чемпионатда ветеранрин дестедин 10 командадин арада 5-чкаяр кьуна. Хуьруьн чкадин командадиз ибур пис нетижаяр туш, — къейдна спортдин тежрибалу ветеранди.
Спортдин сувариз элкъвей турнир, адан иштиракчияр мугьманпересвилин къанунралди къунагъламишуналди ва разивилелди рекье хтуналди яргъалди рикIел аламукьдайди хьана.
Дашдемир Шерифалиев
