Сулейман-Стальский райондин гзаф хуьрерин кимерал ва хийир-шийирдин мярекатрални гзафбурун сиверай ван къвезвайбурни и гафар я: “Яда, ичер маса къачудай, кьабулдай са чка авачни? Баркаванар, тарарин кIанерик кIвахьна, ктIана куьтягь жезва. Гъилиз са кепек къведалди, варани-зара хьана, са куьникайни жезвач, бада физва зегьметар”.
Эхь, ибур исятда инсанри мукьвал-мукьвал эзберзавай келимаяр я. Жечни кьван, цIи ичерин тум-кьил авач, гьакьван булдиз битмиш хьанва. Амма абур кьабулдай чка авач. Виликрай, гьикьван лагьайтIани, муьштерийри, чкадал къвез, маса къачудай, пар чIугвадай машинар къвез, кIвахьайбур цехриз, кьабулдай маса чкайриз тухудай. Гила и крарикай ван-сес амач.
ИкI лугьузвайбур вишералди ава, гьа жергедай яз — арендаторар, лежбервилин майишатар кутунвайбурни. Миже хкуддай цехар кардик кутадайбур кьванни майдандиз экъечIзавач. Виликрай районда са шумуд авайди тир ахьтин цехар. Гьа са вахтунда кутазвай багъларин майданарни йисалай-суз гегьенш жезва. Пака абур вири бегьердал атайла, вучда бес?
Хуьруьн майишат вилик тухун патал райондин администрацияди хейлин кIвалахар авунва ва и важиблу кар давамарни ийизва. Идахъ галаз сад хьиз, яр-емиш кьабулдай, миже хкуддай са цех кьванни кардик хьанайтIа, гьикьван хъсан жедай. Кьасумхуьрел алай “СССР-дин 50 йис” тIвар галай консервиярдай завод ремонт авун, кардик кухтун патал жуьреба-жуьре йисара алахъунар авуна, амма арадиз атай кар хьанач, еке харжияр герек къвезва. Гьукуматдин патай куьмек тахьайла, мадни четин жезва. Гьана са кутугай цех кардик кутаз хьанайтIа, гележегда заводдин амай чкаярни туькIуьр хъийиз алакьдай жеди. Са шумуд спонсордин фикир-меслят сад хьанайтIа, белки, кардиз куьмек жедай, цIи тахьайтIа, къведай, гуьгъуьнин йисара кьванни.
Алай вахтунда багълара “снаб”, “розмарин”, “астраханский”, “делишес”, “семеренка”, “афат”, “зимний шафран” ва маса сортарин ичер дигмиш хьанва, кIвахьзава, ктIизва. Зурарни ийизва инсанри, гьикьван авурай гьабурни. Авлай хьанва малариз — са къатда гьабурузни гузва емишар.
Са арада лесхоздин цех кардик акатиз аквада. Авай шартIариз килигайла адан мумкинвилерни гъвечIибур я. Куьрелди, емишар бул тир чи ерийра абур маса гунин месэла гьелелиг тIал алайди яз амукьзава.
Райсудин Набиев
