Эхиримжи йисара Сулейман-Стальский район яшайишдин, экономикадин, культурадин ва маса рекьерай вилик физва, кутазвай багъларин, уьзуьмлухрин майданар, гьасилзавай суьрсетдин кьадар артух жезва. И кIвалахриз Дагъустан Республикадин руководстводи, министерствойринни ведомствойрин руководителри хъсан къиметни гузва.
И йикъара райондиз, хуьруьн майишат вилик тухунин, промышленностдин карханаяр кIвачел ахкьалдарунин, дигидай цин къаналар цIийикIа туькIуьр хъувунин рекьерай тухузвай кIвалахрихъ галаз мукьувай таниш хьун патал Дагъустан Республикадин хуьруьн майишатдин ва суьрсетдин министр Абдулмуслим Абдулмуслимов, “Минмелиоводхоз РД” ФГБУ-дин директор Залкип Къурбанов, “Дагсельхозстрой” ГКУ-дин директор Мегьамед Юсупов мугьман хьана. Абур райондин кьил Нариман Абдулмуталибова, райсобранидин председатель Штибег Мегьамедханова, райадминистрациядин кьилин 1-заместитель Лацис Оружева, райондин хуьруьн майишатдин ва суьрсетдин управленидин начальник Мегьамедзагьид Бабаева хушвилелди кьабулна.
Мугьманар ва райондин гьакимар инвестиционный проектар кардик кутуналди тешкилнавай “Гуьлгери вацI”, “Зардиян”, “Паласа”, “Члар” ООО-риз фена, анра ципицIар ва ичер кIватI хъувунин кIвалахар кьиле физвай, гьалдихъ галаз таниш хьана.
Министр Абдулмуслим Абдулмуслимоваз интенсивный къайдадин багълар кутунин рекьяй районда уьмуьрдиз кечирмишзавай “Стальские сады” проект иллаки итижлу хьана. Ада къейд авурвал, ихьтин проектдиз тешпигьди мад республикада авач, ам амай муниципалитетризни чешне хьун лазим я.
Гуьгъуьнлай мугьманар ва райондин гьакимар “Мевер” заводдиз ва цIийикIа туькIуьр хъийизвай “Кировский» къаналдал фена, анра тухузвай кIвалахрихъ галаз таниш хьана.
Залкип Къурбанова лагьайвал, вичин яргъивал 7,5 километр тир “Кировский” къанал цIийикIа туькIуьр хъувунин кIвалахар алай йисан декабрдин вацра акьалтIарда. И кар патал республикадин ва федеральный бюджетрай 100 миллион манат пул ахъайнава.
— Жуван вилералди акуначиртIа, зун Сулейман-Стальский районда экономикадин, промышленностдин, хуьруьн майишатдин рекьерай ихьтин еке кIвалахар кьиле тухузвайдахъ, инвестиционный проектар уьмуьрдиз кечирмишзавайдахъ, хъсан еридин продукция гьасилзавайдахъ агъадачир, — лагьана А.Абдулмуслимова. — Вири и крари кIвалахдин алава чкаяр тешкилдай ва бюджетдиз пулдин алава такьатар гъидай мумкинвал гузва.
Республикадин меркездай атанвай багьа мугьманар районда тухузвай кIвалахрилай рази яз амукьна.
Хазран Кьасумов
