Махачкъаладин Советский райондин судди РД-дин тIебиатдин
ресурсрин ва экологиядин министр тахсир квачирди яз гьисабна
КIвалахдин рекьяй везифаяр тамамардайла, къайгъусузвал авунай тахсир кутунвай Дагъустандин тIебиатдин ресурсрин ва экологиядин виликан министр Набиюла Къарачаев гьахъ тирди субутнава. Идакай ТАСС-ди хабар гузва.
“Уголовный делодин сергьятра аваз кьиле тухвай ахтармишунрин нетижада Н.Къарачаевак тахсир кутадай са делилни тестикь хьанач. Суддиз ам гьакъикъатдани тахсиркар тирди тестикьарзавай делилар жагъанач. И шартIар фикирда кьуна, судди ам гьахъарзавай къарар кьабулнава.
РикIел хкин, РД-дин прокуратуради кьиле тухвай ахтармишунрин нетижада Н.Къарачаевак, РФ-дин Уголовный кодексдин 293-статьядин 1-паюнал бинеламиш хьана (кIвалахдин рекьяй мажбурнамаяр тамамардайла, къайгъусузвал авун), тахсир кутунвай. Силисдин делилралди, Н.Къарачаеван къайгъусузвал себеб яз, яргъал тир вахтунда яшайишдин амукьаяр, зирзибилар хъуртал тухун тавуна, агьалияр яшамиш жезвай чкайра амукьна. И карди агьалийрин яшайишдин хатасузвал таъминарзавай къайдаярни Махачкъала, Каспийск шегьеррин агьалийрин ихтиярар чIурнавай. Амма судди виликан министр и дуьшуьшда тахсир квачирди яз гьисабна.
«Лезги газет»
