И мукьвара Москвада вирироссиядин журналистрин арада “Гафунинни хъсанвилин алакъада” (“В союзе слова и добра”)  лишандик кваз кьиле тухвай конкурсда гъалиб хьайибуруз  пишкешар гунин шад мярекат хьана.  Абурун жергеда чи ватанэгьли, машгьур публицист ва общественный деятель  Алик  Абдулгьамидовни  авай. Да­гъустандин журналист “Альтруист кьин, ва я алай аямдин мектебдин драма” макъала гваз “Периодикадин издание» номинацияда  гъалиб хьана. “Дагъустандин правда” газетда чапнавай  ам вичин хсуси такьатрихъ  хуьрерин аялриз алай аямдин школаяр эцигун кьетI авур,  ам­ма нетижада  вичин кьил гзаф кьадар силисра гьатай инженер Фридун Шагьпазоваз  бахшнава.

“Адетдин советрин инженердин” тереф  Россияда машгьур журналистди хвена: Алик Абдулгьамидова неинки  масабуруз гьакъисуздаказ куьмек гуз кIан хьайи эцигунардайдакай  са жерге макъалаяр кхьена, гьакIни ада уьлкведин Президентдиз арадал атанвай гьалдикай гуьруьшдин вахтунда суьгьбетни авуна.

Конкурс тешкилай “Уьмуьрдин цIар” ва “Россиядин телевиденидин академия”  фондари Дагъустандин журналистдин макъалайриз еке къимет  гана ва пишкеш гъиляй-гъилиз вахкун патал адаз Москвадиз  мугьман хьун теклифна.

Алай йисуз конкурсдиз Россиядин вири  регионрай  260-далай гзаф кIвалахар  атанвай.

Хатима Нисредова