Гьеле аялзамаз етим хьайи, гзаф четинвилериз таб гайи, 41 йисан вахтунда гьар жуьре къуллугърал зегьмет чIугур касдикай, ада кечирмишнавай уьмуьрдин рекьикай рахун тавун еке гъалатI жеда. Къенин зи ихтилат 1937-йисуз лежбердин хизанда дидедиз хьайи Абдуллатифов Султанмагьамед Абдуллатифовичакай я. Адан аял вахтар залум дяведин йисарал ацалтна. ЧIехибуру дадмишай уькIуь-цурудан дадни акуна адаз. Султанмагьамедан буба Абдуллатиф Мегьарамдхуьруьн районда авай диплом гвай сад лагьай агроном тир. Ада “Социализмдин рехъ” тIвар алай колхозда кIвалахзавай. 1941-йисуз ам гуьгьуьллубурун жергеда аваз дяведиз фенай. Гьайиф хьи, адан авай са хва вичин бубадин тавазвилерикай бегьем лезет хкудиз агакьнач. 1944-йисан эхирра ам телеф хьайидан гьакъиндай хабар агакьна. Буба кьилелай алатнавай хтул чIехи буба Велимагьамеда вичин лувак чIехи авунай.
1944-1950-йисара, гьар юкъуз са килограмм техилрин кьилер кIватI тавуртIа, аялар мектебдиз ахъайдачир. Паласадай техилар кIватIна, ратIарал хкайвилин гьакъиндай справка гудай. Гьа справкадин бинедаллаз абур мектебдиз ахъайдай.
Велимагьамед буба гьа йисара Кьиблепатан Дагъустандин муфтий тир. Дяведин четин йисара ада, хуьрериз физ, агьалийривай фронтовикриз куьмек яз шейэр кIватIнай. Белиждин станциядилай фронтдиз кьве вагон шейэр ракъурнай. 1945-йисуз Велимагьамед бубадиз сифте чинал чухсагъул малумарна, “За ратный труд” кхьенвай, И.В.Сталинан къул алай, урус чIалаз таржума авунвай Къуръан багъишнай. Велимагьамед бубадин и багьа ядигар адан эмедин рушан уьмуьрдин юлдаш Гъалиб Садыкъидин кIвале ава.
Залум дяве куьтягь хьана. Четинвилеризни килиг тавуна, Султанмагьамеда кIелун давамарна. Школа акьалтIарзавай йисуз Велимагьамед буба рагьметдиз фена. Гила хизандин вири дердияр Сефижат дидедин хивез аватнавай.
1955-йисуз Мегьарамдхуьруьн юкьван школа, гуьгъуьнлай Махачкъалада эцигунрин техникум акьалтIарай Султанмагьамед хайи хуьре эцигзавай райбольницадиз прораб яз рекье туна. Чирвилерихъ ялзавай жегьил секиндиз акъвазнач. 1963-йисуз ада Ростовдин политехникум агалкьунралди акьалтIарна. Дагъустандин алакъадин управленидин руководстводин къарардалди Султанмагьамед Табасаран райондин алакъадин конторадин начальниквиле тайинарна. И районда кIвалахзавай йисара заочнидаказ Москвадин электротехнический институт акьалтIарна, “инженер-экономист” пешекарвални къачуна. Вад йисуз Сулейман-Стальский райондин алакъадин отделдани зегьмет чIугуна. Мамонтовка ва Ленинград шегьерра пешекарвилин дережа хкажзавай курсар акьалтIарна.
Винидихъ тIварар кьур районрин алакъайрин отделра кIвалахзавай вахтунда цIийи дараматар эцигна. 1973-йисалай С.Абдуллатифов Мегьарамдхуьруьн Советдин исполкомдин председателвиле хкяна. Ада и къуллугъдал кIвалахзавай йисара Мегьарамдхуьре сбербанкдин кьве дарамат, агьалияр патал агалнавай базардин дарамат (хсуси такьатралди) эцигна, Тагьирхуьрел турбайра аваз яд гъана, агьалияр патал къаналдилай элячIдай кьве муьгъ туькIуьрна, Ярагъдал сагъардай гьамам, медпунктунин дараматар эцигна ва культурадин кIвале тамамвилелди ремонтар авуна.
Мегьарамдхуьруьн, Ярагъ-Къазмайрин хуьрерин куьчейриз чиргъ вегьена. Мегьарамдхуьряй Вини Тагьирхуьрел физвай рехъни, чиргъ вегьена, хъсан къайдадиз гъана.
Алатай асирдин пудкъанни цIуд лагьай йисара хуьрерин советрин исполкомрин вилик хуьруьн майишатдин хиле тамамарна кIанзавай планар эцигзавай. Малдарвилин, багъманчивилин хилерай республикада кьвед лагьай чка кьуниз килигна, Мегьарамдхуьруьн Советдиз Дагъустандин Верховный Советдин яру пайдахар, Министррин Советдин гьуьрметдин грамотаяр, пулдин пишкешар ганай ва улакь багъишнай.
ЦIуд йисуз и къуллугъдал зегьмет чIугур Султанмагьамед Абдуллатифович Мегьарамдхуьруьн райондин сбербанкдин управляющийвиле кIвалахал хъфена. 1997-йисуз, банк агалун себеб яз, ам лайихлу пенсиядиз экъечIна. Султанмагьамед Абдуллатифова зегьметда ихьтин агалкьунар къазанмишуник ада регьбервал гайи коллективрин лайихлу пайни ква. Султанмагьамед Абдуллатифович “Зегьметдин ветеран”, “Гьакъисагъ зегьметдай”, Ватандин ЧIехи дяведа гъалиб хьайидалай инихъ 50, 60 йис тамам хьунин юбилейрин медалрин, “Сбербанкдин отличник” тIварцIин ва министерствойрин, са жерге маса ведомствойрин гьуьрметдин грамотайрин сагьиб я.
Пенсияда аватIани, Султанмагьамед халу хуьруьн, райондин общественный уьмуьрдивай са юкъузни къерех хьанвач. Вичин уьмуьрдин юлдаш Саибат халани галаз ада вад велед уьмуьрдин шегьредал акъудна. Абуру чIехи дидедизни бубадиз 8 хтул, 4 птул багъишнава.
Тапшурмишай гьи къуллугъ хьайитIани намуслувилелди, жавабдарвилелди тамамарай квехъ чандин мягькем сагъвал, уьмуьрда, хизанда хушбахтлувал хьурай, гьуьрметлу Султанмагьамед Абдуллатифович.
Афисат Айдемирова
