30-январдиз са акьван яргъалди чIугун тавур азардикди 86 йисан яшда аваз къени инсан, чешнелу хизандин кьил, уьмуьр инженер-механикдин пешедиз бахш авур Гьидаят Зугьрабович Фаталиев кечмиш хьана.
Гь.З.Фаталиев 1936-йисан 15-августдиз СтIал Сулейманан райондин Ивигрин хуьре дидедиз хьана. Диде-бубади Азербайжанда нафтIадин мяденра кIвалахзавайвиляй, 1948-1954-йисара ада Мирбашир ва Къазанбулаг шегьеррин мектебра кIелна. Юкьван мектеб 1956-йисуз Хутаргъа акьалтIарна.
Советрин армиядин жергейра къуллугъайдалай кьулухъ Азербайжандин политехнический институтда инженер-механикдин пеше къачуна. 1965-1972-йисара Сумгаит шегьерда авай трубопрокатный заводда старший инженер-технолог яз кIвалахна. 1972-1996-йисара Азербайжандин нафтIадин ва химиядин институтдин филиалда, Сумгаитдин политехнический колледжда муаллим яз зегьмет чIугуна. 1996-йисуз Гь.Фаталиев Дербент шегьердиз хтана.
1996-2003-йисара ада Москвадин экономикадинни праводин институтдин Дагъустанда авай филиалда декандин везифаяр тамамарна.
Гьеле мектебда кIелзавай йисара Гь.Фаталиева шаркь патан шииратдиз ва философиядиз итиж ийизвай. Ада О.Хайяман, М.Физулидин, Н.Генжевидин ва маса шаирринни философрин эсерар лезги чIалаз элкъуьрна, кьуд ктаб чапдай акъудна.
Гь.Фаталиев хъсан пешекар, къени инсан хьиз, чешнелу хизандин кьилни тир. Адан хизанда пуд хвани са руш чIехи хьана.
Мукьва-кьилийрин, ярар-дустарин, санал кIвалахай юлдашрин патай еке гьуьрмет авай Гь.Фаталиева вичивай куьмек герекдаз, меслят къачуз атай са касдизни ваъ лагьанач. Ам хъсан насигьатчи, суьгьбетчи тир.
Гьидаят Зугьрабовичан экуь къамат чи рикIера амукьда. Аллагьди рагьметар гурай вичиз!
«Лезги газет»
