16-октябрдиз чи арадай машгьур алим, политолог, профессор, Нью-Йоркдин илимрин академиядин член, РАН-дин дуьньядин экономикадин ва международный алакъайрин Институтдин (ИМЭМО) илимдин кьилин къуллугъчи, буржуазиядин сиясатдин философиядин ва социологиядин сектордин регьбер Камалудин Серажудинович Гьажиев акъатна. Адан 82 йис тир.
К.С.Гьажиев СтIал Сулейманан райондин Зугьрабхуьре дидедиз хьана. Кьве йиса авайла, ам бубадикай магьрум хьана: Серажудин Гьажиева 1942-йисуз Ватандин ЧIехи дяведа Кавказ патал кьиле фейи женгера кьегьалвилелди чан гана. Кьве стхани са вах текдиз амукьай дидеди чIехи авуна.
К.Гьажиева эвел Махачкъалада медучилище акьалтIарна, са шумуд йисуз Кьиблепатан Дагъустандин районра медицинадин пунктарин заведующий яз кIвалахна. 1970-йисуз ада вадралди МГУ-дин тарихдин факультет куьтягьна, агалкьунралди илимрин кандидатвилин, докторвилин диссертацияр хвена.
Гуьгъуьнин йисара К.Гьажиева Россиядин сиясатдин илим, философия, геополитика вилик финик кьетIен пай кутуна. И хилериз талукь месэлайрай профессордин къелемдикай тамам монографияр, кьилдин ктабар хкатна. Санлай къачурла, алимди кхьей монографийрин кьадар 50-далай алатнава. Ам гьакIни вузар ва дипломатиядин академия патал акъуднавай къад ктабдин, тарихдин, сиясатдин, философиядин, экономикадин илимриз талукь вишералди макъалайрин автор я.
Чи ватанэгьли Россияда политологиядай вузра чирвилер къачудай пособие кхьей сифтегьан алимрикай сад яз гьисабзава. Адан “Политическая наука” тIвар алай ктабдихъ уьлкведин алимрин арада еке нуфуз ава. Мадни башкъа, адан ктабар къецепатан чIалариз таржума авунва ва Америкадин, Европадин, Азиядинни Африкадин хейлин уьлквейра абурай студентри, тарихчийри, дипломатри, сиясатчийри чирвилер къачузва.
Саки вири уьмуьрда Ватандивай яргъа яшамиш хьанатIани, Камалудин Серажудиновича хайи чIал, бубайрин чил рикIелай алуднач. Къецепатан ирид чIалалай гъейри, адаз фасагьатдиз лезги чIални чидай ва гьатта чIалан месэлайриз талукь макъалаярни кхьенай.
Камалудин Серажудинович рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва. Алимдин экуь къамат чи рикIера амукьда.
“Лезги газетдин”
редакциядин коллектив
