2-июлдиз Кьурагь райондин администрацияда РД-дин Гьукуматдин Председатель Артем Здунован тапшуругъдалди Дагъустандин медениятдин ирс хуьнин рекьяй Агентстводин регьбердин везифаяр тамамарзавай Руслан Шехмегьамедова Кьурагь райондин агьалияр кьабулна. Гуьруьшда муниципалитетдин кьил Замир Азизова иштиракна.
Районда кардик квай са КФХ-дин руководитель Алияр Ибрагьимова эхиримжи йикъара къвайи марфари Кьурагьрин хуьрелай винидихъ галай рекьер къайдадикай хкуднавайдакай, райондин 23-ДЭП-диз техника авачирдакай лагьана ва рекьер ремонт авунал машгъул идарадиз техника чара авун тIалабна.
З.Азизова, А.Ибрагьимован тIалабунин тереф хуьналди, райондин рекьерин идарадиз эхиримжи 20 йисан вахтунда са жуьредин техникани ахъай тавунвайди ва республикадин тайин тир къуллугърин вилик и месэла эцигунин игьтияж авайди къейдна.
Кьурагьви Мегьамедшакир Мамедова вич Чечняда кьиле фейи вакъиайрин иштиракчи хьайиди ва вичиз а чIавуз дяведин гьерекатра къалурай викIегьвилерай “Дирибашвилин” орден гайиди лагьана. Амма вучиз ятIани адаз гилани и вакъиайрин иштиракчи хьайиди тестикьарзавай документ ганвач. Ада Р.Шехмегьамедовавай вичиз и карда куьмекун тIалабна.
Райондин агъсакъалринни ветеранрин советдин председатель Фахрудин Мирзоева алай вахтунда Кьурагьрин хуьре цин месэла лап тIал алайбурукай сад тирди къейдна. Ада и месэла гьялунин карда куьмек тIалабна. Ф.Мирзоеван гафаралди, яшайишдин амукьаяр, зирзибил тухунин ва гадарунин тендерда “Экологика” ООО-ди гъалибвал къачунватIани, хуьруьн куьчейра михьивал хьанвач, амма агьалийривай, гуя зирзибил гадарунай я лугьуз, пулдин такьатар къачузва. Ада и гьахъсузвилел эхир эцигуниз эвер гана.
“Дагъдин булах” газетдин кьилин редактор Алван Рамазановади Кьурагьрилай винидихъ галай хуьрериз тIебии газ тухунин месэла къарагъарна. Ада къейд авурвал, дагълух хуьрерай инсанар куьч тахьун патал анра къулай шартIар тешкилуниз кьетIен фикир гана кIанда.
З.Азизова Кьурагьрин хуьр целди таъминарун патал федеральный программадай 80 миллион манатдилай виниз пулдин такьатар пландик кутунвайди, тендер малумарнавайди, мукьвара и кIвалах гъиле кьадайди къейдна. Ада гьакIни Кьурагьрилай винидихъ галай хуьрер газдалди таъминарун республикадин “Дагъустан 2024-йисалди газдалди таъминарун” программадик кутунвайдакай хабар гана.
Гуьруьшдин вахтунда Замир Азизова Кьурагь район яшайишдинни экономикадин жигьетдай вилик тухун патал тамамарна кIанзавай кIвалахрикай гегьеншдиз суьгьбетна ва Р.Шехмегьамедоваз райондиз атунай вири районэгьлийрин тIварцIихъай сагърай лагьана.
Р.Шехмегьамедова районда авай гьялна кIанзавай месэлайрикай талукь ведомствойрив хабар агакьарун хиве кьуна. Ада гьакIни РД-дин медениятдин ирс хуьнин рекьяй Агентстводин кIвалахдикай куьрелди ихтилатна ва районда медениятдин ирсинин гуьмбетар хуьнин карда меслятар къалурна.
Алван Рамазанова
