Агъадихъ куьне кIелдай келимаяр, цIарар са зи бажарагъдин бегьерар туш. Абурук, белки, квез чидай, ван хьайи мисаларни, гафарни ква жеди. Зазни гзафбур, рекьера-хуьлера авайла, чи инсанривай ван хьайибур я. Кар адал алач, кар алайди абур рикIел хуьн, масадбурув агакьар хъувун, акьуллу келимайрикай менфят къачун, рахунра ишлемишун ва лезет хкудун я.

Алай девирдин вагьшивал вуч ятIа чидани? Инсанар вагьшийрилайни фенва.

Алай вахт ахьтинди я хьи, мехъер яни, ясдин мярекат яни кьил ахкъатзамач.

Асуллу касдин вилерайни, чинайни берекатдин нур хъуьреда.

Ажугъдикай дуст кьуни садан кьилелни барка гъайиди туш.

Ахцегьа хъвана, Усугъчайдин куьчеда ярх хьана.

Амалдар сикIрен тумуникай кIуртунин хев жедай макъамни авайди я.

Алем бинедилай, югъни йиф хьиз, сад-садаз акси къуватар аваз халкьнава. Гьавиляй дявеярни куьтягь жедач.

(КьатI ама)

Нариман  Ибрагьимов