«Аэрофлот» дестедик акатзавай «Победа» компания Махачкъала-Анталья (Туьркия) рекьяй рейсер тамамарунив эгечIнава. Идакай Махачкъаладин аэропортунин пресс-секретарь Сапура Мегьамедовади хабар гузва. Адан гафаралди, рейсер гьафтеда пуд сеферда: арбе, жуьмя ва гьяд йикъара Boeing 737-800 самолётда аваз тамамарда.
Идалайни гъейри, «Победа» компаниядин самолётри Махачкъаладай Москвадиз, Санкт-Петербургдиз, Сургутдиз, Дубайдиз (ОАЭ) ва Стамбулдиз (Туьркия) лув гузва.
5-июлдилай башламишна, Россиядин «Red Wings» («Яру лувар») авиакомпанияди международный «Жуковский» аэропортунай цIийи ва вахт-вахтунда тамамардай къенепатан 8 рейс кардик кутада. ЦIийи рекьери Москвадин региондихъ галаз Махачкъаладай транспортдин алакъа хъсанарда.
ГьакIни «Red Wings» авиакомпанияди Псков — Махачкъала рекьяй сад лагьай рейс тамамарунин вахт дегишарнава. И дегишвал, хабар гузвайвал, анжах 27-июндиз тамамардай рейсиниз талукь я. Компаниядин сайтда къалурнавайвал, Махачкъаладин «Уйташ» аэропортунай экъечIай самолет Псковдив Москвадин вахтуналди йикъан сятдин 12 жез 15 декьикьа амайла, агакьда. Элкъвена Махачкъаладиз гьавадин гими йикъан сятдин 1-даз рекье гьатда.
РикIел хкин, Псков — Махачкъала рейсер гьафтеда са сеферда, хемис юкъуз, Россиядин «SSJ-100» самолётра аваз тамамарда. Гьавада жедай вахт — 3 сятни 45 декьикьа. Псковдай Махачкъаладиз йикъан сятдин 12-даз 25 декьикьа кIвалахайла, рекье гьатда, элкъвена — пакаман сятдин 7 жез 20 декьикьа амайла.
* * *
Дагъустандиз Чечнядихъ галаз ракьун рекьин алакъа кардик кутадай фикир ава. РД-дин Гьукуматдин премьер-министрдин делилралди, и проект Каспийдин гьуьлуьн къерехдин кластер (кIватIал) виликди тухунин сергьятра аваз гьазурзава.
«Алай вахтунда чи планрик «Уйташ» аэропортунай Дагъустандин Огни шегьердиз, ахпа — Дербентдай ракьун рехъ туькIуьрунин месэла ква. И рекье электропоездар, электричкаяр къекъведа ва чи туристар санай масаниз тухуда. Идахъ галаз сад хьиз, анай (аэропортунай) республикадин кеферпатазни, Чечня Республикадин сергьятдал кьван рехъ туькIуьрда», — лагьана ада.
«Лезги газет»
