«Суалар ва жавабар» рубрикадай

— Буба, фендигар вуч лагьай гаф я ва ам гьихьтин инсандиз лу­гьуда?

— А гаф, чан хва, фенд, фитне гафарихъ галаз алакъалу я. Фендигар михьи тушир, адалатсуз инсандиз лугьуда. Ахьтин инсанрин эхирни хъсан къведач. За ваз фад зун шагьид яз гьакъикъатда хьайи са агьвалат ахъайда. Вуна хъсандиз яб це, ахпа ваз фендигар вуж ятIа чир жеда.

Хуьре са агьваллу хизандин къуншидал са фендигар дишегьли яшамиш жезвай. Гьалал зегьметдалди къазанмишиз, кьил хуьзвай къуншидал и кас датIана пехил тир.

Садра къунши патал фейила, адан кIваляй пул, багьа шейэр квахьна. Шак са шумудал фена, виридалайни гзаф — фендигардал. Адаз пул, чуьнуьхнавай затIар хкваш, тахьайтIа, милицаяр гъида ла­гьайла, угъриди, гьич чин кьванни яру тахьана, вичиз фенд акъудна.

— Эгер куь шак зал фенватIа, за исятда, мискIиндай Къуръан гъана, капI ийизвай ирид касдин вилик кьин кьуна, зи михьивал субутда. Гьавайда зал шак гъиз, куь девлет квадармир, — лагьана ада.

Са арадилай ам вири магьле кIватI  хьанвай чкадал михьи, лацу агъ­дин парчадик  кутунвай, Къуръан гваз хтана. Ада пак ктабдиз пудра­ темен гана, пелел эцигна. Ахпа вичин эрчIи гъил Къуръандал эцигна, кьин кьуна. Вири мягьтел хьана, иесини агъуна, гъил къачун тIалабна…

Акур аламатдин эхирдай инал алай шагьидрикай сада Къуръан квай багълама ахъайна. КилигайтIа, багъламадик квайди 1960-йисуз Ростов шегьердин чапханада печатдай акъуднавай хуьруьн майи­шатдин техникадин уьлчмейрикай кхьенвай еке яцIу ктаб тир. Угъри­ беябур хьана. Адаз лугьур — талгьур чизмачир. Чуьнуьхнавай шейэр ва пул хкана, вахкана. Суд-дуван гьа инал куьтягь хьана.

Гьа чIавалай адал гьакъикъи фендигар тIварни акьалтна. Гьа тIвар алаз ам лап фад дуьньядайни фена.

Рамазан Велибегов, Цнал