16-февралдиз 94 йисан яшда аваз вичин вири уьмуьр республикадин образованидин хел вилик тухуниз, акьалтзавай несилриз чирвилерни ватанпересвилин тербия гуниз бахш авур муаллим Фируза Бабаевна Ярагьмедова рагьметдиз фена.
Ф.Б.Ярагьмедова 1927-йисан 27-августдиз дидедиз хьана. Зегьметдин рехъ 1948-йисуз Махачкъала шегьердин 11-нумрадин 7 классдин мектебда географиядин муаллим яз кIвалахунилай гатIунна. 1966-йисан январдилай 2007-йисалди (пенсиядиз экъечIдалди) ада республикадин меркездин 38-нумрадин гимназияда зегьмет чIугуна.
Фируза Бабаевна вичин пешедин гъавурда хъсандиз авай тежрибалу пешекар тир. Гьар са аялдив, абурун алакьунар фикирда кьуна, кьетIенвилелди эгечIун, классдилай къеце кIвалах кьиле тухун, школьникрихъ галаз жуьреба-жуьре мярекатар тешкилун — ибур муаллимдин кIвалахдин асул терефар тир. Фируза муаллимди вичин тарсара искусстводин, медениятдин эсеррикайни гегьеншдиз менфят къачузвай. Ада аялриз кьатIуниз ва фикириз, тарсунин эхирдай нетижаяр кьаз, тапшуругъар веревирд ийиз чирзавай. Хъсан муаллимдин гъилик чирвилер къачузвай аялри лагьайтIа, имтигьанар вахкудайла, конкурсра, олимпиадайра чпихъ вини дережадин чирвилер авайди тестикьарзавай.
Фируза Бабаевнадикай гзаф несилриз муаллим ва насигьатчи хьана. Ада абуруз неинки са географиядай чирвилер гана, гьакIни гьар са аялдикай чешнелу инсан хкатун патал вири къуватар сад авуна. Ам вичивай ва масабурувай гзаф истемишдай, мектебдин агалкьунрал дамахдай, санал кIвалахзавай юлдашрин, школьникрин, диде-бубайрин, шегьерэгьлийрин патай еке гьуьрмет авай инсан тир.
Дагъустандин муаллимрин пешекарвал хкаждай институтда ам виридаз чидай. Ина Фируза муаллимди жегьил пешекарриз вичин тежрибадикай суьгьбетардай.
СССР-дин просвещенидин отличник, кьилин категориядин муаллим, Дагъустандин лайихлу муаллим, зегьметдин ветеран, зегьметдин фронтдин ветеран, Ватандин ЧIехи дяведин иштиракчидин хендеда Фируза Бабаевнади жуьреба-жуьре вакъиайрив ацIай, чешнелу яргъал уьмуьр кьиле тухвана. Ам гзаф къени инсан, зегьметкешвилин чешме, кIани диде, хтулринни птулрин къайгъудар баде тир. Ам чи рикIера гьахьтинди яз амукьда.
Мукьва-кьилияр
