Алай аямдин гзаф аялри, гьа жергедай яз мектебдиз фидай яшдив агакь тавунвайбуруни, компьютердин технологийрикай менфят къачуналди, илимдиз, цIийи затIар яратмишуниз фикир гузва. Аял еримлу хьун патал ам рикIиз хуш кардал машгъул хьунин рекье манийвал тагунни важиблу я.

И мукьвара заз ютубда авай “Наука А-Я” каналдай акур Азимни кьетIен алакьунар авай аялрин жергедай я. Заз чир хьайивал, ам ругуд йисан яшда авай чи гъвечIи ватанэгьли, Москвада яшамиш жезвай курхуьруьнви Рагьим Адилован велед я. Рагьима меркезда духтурвиле, адан уьмуьрдин юлдашди программиствиле кIвалах­зава. Азиман диде-бубади хиве кьаз­вайвал, аялди са шумуд варз идалай вилик илимриз (химиядиз, физикадиз) итиж ийиз гатIунна.

Инсанрин арада чкIанвай фикирдалди, химияни физика четин илимар я. Алай аямдин образованида бя­зи къанунар, гьалар ва гье­рекатар­ къугъунрин жуьреда чирунин, кьа­тIу­нунин месэла дебдиз ­элкъвенва. И жуьреда аялрин ди­къетлувал, фа­гьумлувал, элкъуьр­на кьунвай тIе­биатдиз ийизвай итиж артух жезва.

Бязибуру Азимаз химияни физика садрани герек жедач лугьузва, амма аялди и фикир дуьз туширди вичин краралди, илимдиз рикIивай майилвал авуналди успатнава. Маса гафаралди лагьайтIа, инсанрин уьмуьрда арадал къвезвай гзаф гьерекатар тIвар кьунвай илимрин бине яз гьисабиз жеда.

“Чна фикирзавайвал, Азима илимдиз итиж авун дуьшуьшдин кар туш. Ам вичин чIехи буба Азим Адиловичал, РД-дин лайихлу муаллим, баде Рубина Эминбеговнадал атанва”, — лугьузва Азиман ди­де-бубади.

Аялдин алахъунар акурла, диде Ангара Адиловади адан крар фикир тагана тун дуьз тушиз гьисабна. Гьа икI, аялдин машгъулатар  камерадиз чIугуна, ютуб-канал кардик кутун кьетIна.

Арадал гъизвай видеояр шадвал квайбур хьун патал Азима вичин дуст Янадизни вичихъ галаз машгъул хьун теклифна. Ютубдин каналдин тIварни (“Наука — А-Я”) гьа икI арадал атана — аялрин тIварарин сад лагьай гьарфар кваз.

Алай вахтунда абуру камерадиз чIугвазвай видеороликар соцсетриз акъудзава. Аялрин крариз хъсан къимет гузвайбурун, абурал фикир желбзавайбурун кьадар югъ-къандавай артух жезва. Кьиле тухузвай жуьреба-жуьре ахтармишунар, тежрибаяр килигзавайбур мягьтелардайбуруз элкъвенва.

Умудлу я, гележегда аялрикай зурба ахтармишунар, ачухунар кьи­лиз акъуддай илимдарар хкат­да­.

К.Ферзалиев