Алатай гьафтеда Кьурагь райондин КьепIиррин хуьре, гьар йисуз адет хьанвайвал, спортдин ва политикадин деятель Фикрет Асланован экуь къамат рикIел хкунин лишан яз, жегьил-жаванрин арада азаддиз кьуршахар кьунай республикадин турнир кьиле фена.
Къейд ийин, Фикрет Асланова вичин зегьметдин рехъ КьепIиррин хуьруьн школадилай, физкультурадин тарсар гузвай муаллимвилелай башламишна. Ада дагъви гадайриз азаддиз кьуршахар кьунин сирерни чирна. ИкI, муаллимди хуьре азаддиз кьуршахар кьунин спорт вилик тухвана. Буйнакскда кIелдай чIавуз Ф.Асланов Сали Сулейманахъ галаз таниш хьанай, адахъ галаз дуствал хуьналди чи ватанэгьлиди спортдиз талукь вичин бязи фикирар дегишна. ИкI, Фикрет Асланов мадни зурба, мадни къуватлу хьана. Ученикрин ва хуьруьн жегьилрин арада чIехи гьуьрмет къазанмишай муаллимдин хиве школадин директордин, гуьгъуьнлай КьепIиррин хуьруьн халкьдин депутатрин советдин председателдин, Кьурагьрин РАЙПО-дин, КьепIиррин хуьруьн кавхадин везифаярни гьатна.
Акьалтзавай несилдиз гьамиша чешнедиз элкъвей Фикрет КьепIирви рикIел хкунин акъажунра Дагъустандин 17 райондай атанвай 200-далай гзаф жегьил пагьливанри иштиракна. 26 кг заланвал авай аялрилай башламишна 80-100 кг заланвал авай спортсменрини тамашачийриз итижлу акъажунар къалурна. Абуруз килигиз ва турнир ачухунин мярекатда иштиракиз РД-дин спортдин ва физический культурадин министрдин заместитель, боксдай Олимпиададин чемпион Гьайдарбег Гьайдарбегов, райондин кьил Замир Азизов, азаддиз кьуршахар кьунай международный классдин спортдин мастер Насир Абдуллаев, райадминистрациядин къуллугъчияр, гатун вахтунда шегьеррай хайи ерийриз хтанвай ватандашар, Аслановрин сихилдин векилар атанвай.
Абуру гьар сада Фикрет Асланован уьмуьрдин ва зегьметдин рехъ рикIел хкана, кьепIирви пагьливан жегьилриз гьамиша чешне тирди къейдна. Аслановрин сихилдин векилри гьар йисуз ихьтин турнир тешкилуник къуьн кутунай райадминистрациядин талукь къуллугъчийриз сагърай лагьана.
Турнирда командадин сад лагьай чка Дербент райондин Белиж посёлокдин жегьилри кьуна. Гъалибчийриз райондин ва Аслановрин хизандин патай Кубок, пулдин премияр ва рикIел аламукьдай маса пишкешар гана.
Спортдин и мярекатдин кьилин спонсор Октай Аслановаз райондин кьил Замир Азизова “Кьурагь” шикил багъишна.
Альфред Акимов
