Накь, 12-январдиз, Махачкъалада, Урусрин театрдин ЧIехи залда, Урусатдин печатдин йикъаз талукьарнавай чIехи мярекат кьиле фена. Адан сергьятра аваз РД-дин журналистрин Союздин председатель Али Камалова чпи республикадин журналистикадин тарихда квахь тийир гел тунвай са жерге журналистрив (абурун арада рагьметдиз фенвайбурни авай), бязибурун мукьва-кьилийрив шабагьар (награда) вахкана.

Абурун арада хейлин йисара «Лезги газетдин» кьилин редактор яз кIвалахай чIехи ватанперес, машгьур журналист, публицист Агъариза Узаирович Саидовни авай. Гьайиф хьи, ам 2018-йисан декабрдин вацра кечмиш хьана. Рагьметлудаз кьейидалай кьулухъ ганвай «Легенда дагестанской журналистики» диплом Али Камалова адан хтулдив вахкана.

Агъариза Саидов, гьакъикъатдани, Дагъустандин журналистикадин риваят я. Ада лезги публицистика вилик финик кутунвай пай кьетIенди я. А.Саидов кьилин редактор тир девирдани, исятдани «Лезги газет» республикадин милли чIаларал акъатзавай газетрин арада, тираждин кьадардал гьалтайла, 1-чкадал ала.

«Лезги газет»