Чна идалай виликни хабар гайивал, 28-30-мартдин йикъара республикадин меркездин Р.Гьамзатован тIварунихъ галай Милли библиотекадин дараматда регионрин уртах “Транспорт. Логистика. Алакъа. 2019” выставка кьиле фида.
Выставкайринни ярмаркайрин “АнжиЭКСПО” компанияди республикадин сергьятдал сифте сеферда яз кьиле тухузвай “Транспорт.Логистика. Алакъа. 2019” выставка тешкилунин карда РД-дин Гьукуматдин, транспортдин ва рекьерин майишатдин, гьакIни информатизациядин, алакъадин ва массовый коммуникацийрин министерствойри, карчивилин ва инвестицийрин рекьяй Агентстводи, РД-дин алишверишдинни промышленный палатади иштиракзава.
Эхиримжи йисара Дагъустанда транспортдин са жерге артерияр эцигунин, Махачкъаладин гьуьлуьн международный порт алай аямдин истемишунриз жаваб гудайвал ва аэропорт дибдай цIийикIа туькIуьрунин, логистикадин центраяр арадал гъунин ва са жерге маса кIвалахар активнидаказ кьиле тухузва. Транспортдин хилен вири и къурулушри дурумлудаказ кIвалахунихъ галаз региондин экономика виликди финин месэлаяр сихдаказ алакъада ава. Ибур вири алишвериш вилик тухун, республикадин мулкунилай дашмишзавай метягьрин кьадар артухарун ва и карда хатасузвал таъминарун, транспортдинни логистикадин хилез инвестицияр желб авун ва международный кооперация виликди тухун, идахъ галаз алакъалу яз Дагъустандин тIвар международный транспортдин “Кеферпад-Кьиблепад” коридорда Россиядинни Каспийдин патав гвай уьлквейрин амадагвилин алакъаяр мягькемарунин карда ихтибар ийиз жедай иштиракчи яз раиж авун патал ва икI мад кьиле тухузвай кIвалахар я.
-Транспортдин сеть экономикадин дамарар я. Гьа и фикирдал алаз, яни и хел виликди тухунин кардик пай кутун яз, республикада “Транспорт. Логистика. Алакъа 2019” выставка кьиле тухудай фикирдални атана, — лугьузва “АнжиЭКСПО” компанияди генеральный директор Мукаил Исмаилова. Ада хабар гайивал, выставка агъадихъ галай паярикай ибарат жеда:
санай-масаниз тухудай такьатар: автодорожный, авиациядин, гьуьлуьн ва вацIарин, ракьун рекьин, коммунальный, промышленный транспорт;
транспортдин ва адахъ галаз алакъалу къуллугъар: пассажирар ва пар тухун, экспресс ва курьервилин почта, таможнядин къуллугъар, финансрин къуллугъар ва лизинг, транспортдин такьатар ремонт ва абуруз къуллугъ авунин кIвалахрин жерге, санай-масаниз тухунин хатасузвал;
автотранспорт ва запчастар маса гун. Страхование. Навигациядин ва мониторингдин системаяр.
Выставкадал транспортдихъ ва логистикадихъ галаз алакъалу вири месэлаяр веревирдда, цIийи жуьредин технологийрихъ галаз таниш жедай, амадагрихъ галаз тIал алай месэлаяр веревирд ийидай мумкинвал жеда.
“Транспорт.Логистика. Алакъа. 2019” выставкадин генеральный спонсор Navion компания, официальный автомашин Hyundai я.
Выставкадин программадик транспортдин ва алакъадин хилериз талукь министерствойрин ва ассоциацийрин пешекаррин иштираквал аваз конференцияр, семинарар, бизнес-гуьруьшар, презентацияр кьиле тухун ква.
Выставкадиз талукь тамам делилар “АНЖИЭКСПО” ВК-дин официальный сайтдай жагъуриз жеда: www.anjiexpo.ru. E-mail: info@anjiexpo.ru.
Чи мухбир
