Чи ватанэгьлияр гьар сана
Маса хейлин уьлквейриз хьиз, несибди Франциядиз акъуднавай лезгийрикайни чав хабарар агакьзава. Ахьтинбурукай сад алай вахтунда Парижда яшамиш жезвай ва ана гарун энергетикадин машгьур тешкилатдин маркетингдин отделда кIвалахзавай Эльвира Аливердиева я.
Ам 1995-йисан 25-августдиз Санкт-Петербург шегьерда агъастIалви Буба Гьажимегьамедовичан хизанда дидедиз хьана. Эльвирадин дидени буба (Буба ва Замира Аливердиевар) Сулейман-Стальский райондин Агъа СтIалрин хуьряй я. Санкт-Петербургдиз абур 1985-йисуз куьч хьана. Абурун чIехи руша медицинадин университет куьтягьнава ва алай вахтунда госпиталда офтальмолог яз кIвалахзава, гадади къведай йисуз школа акьалтIарда.
Эльвира гъвечIи чIавалай хъсан чирвилер къачуз, цIийи чирвилерихъ къаних яз вердиш хьана. 2012-йисуз ада шегьердин Пушкинан районда школа куьтягьна, гьа и йисуз СПБГУ-дин Мукьвал тир Шаркь патан экономикадин хиляй Шаркь патан факультетдик экечIна. Санкт-Петербургдин машгьур вузда кIелай йисара Эльвиради араб чIал ва араб уьлквейрин экономика, тарих ва меденият хъсандиз чирна. 2015-йисуз ам Иорданиядин меркез Амман шегьердиз фена ва 5 вацран муддатда анин чIалан школада мадни артух чирвилер къачуна. Гуьгъуьнлай Санкт-Петербургдиз хтана, вузда кIелун давамар хъувуна.
Университет куьтягьайдалай кьулухъ, 2016-йисуз, Эльвира Аливердиевади вичин вилик цIийи макьсадар эцигна: и йисуз ам Лондондиз фена, SOAS (SchooI of OrientaI and African Studies) университетда Мукьвал тир Шаркь патан ахтармишунриз талукь пешедай 2 йисуз магистратурада кIелна. SOAS-да ада Россиядинни Ирандин экономикадин алакъайриз талукь темадай агалкьунралди диссертация хвена, тафаватлувилин диплом къачуна.
Эльвира сифтедай кIелиз Англиядиз фена, ана жуьреба-жуьре компанийра кIвалахдин рекьяй тежриба кIватIна. Амма пешедин рекьяй кIвалах жагъурун регьят крарикай тушир. Идалайни гъейри, ана яшамиш хьунни ужуз акъваззавачир. Вини дережадин чирвилер къачурдалай кьулухъ ам хайи уьлкведиз хтана.
2018-йисан сентябрдиз кьве дипломдин программадай Москвада ВШЭ-дик (Высшая школа экономики) ва Франциядин карчивилин ESSEC Business SchooI школадик (“стратегия ва вири халкьарин бизнесдин менеджмент” пешедай) экечIна. Зур йисуз Москвада кIелна, 2019-йисан эвел кьилера ам Париждиз фена. Адаз ингилис, француз ва араб чIалар хъсандиз чизва.
Франциядиз акъатай лезги рушан фикирар дегиш хьана. Ада гьисабзавайвал, Франциядин инсанарни, медениятни, гьавани хъсан я. Вилик еке мумкинвилер ачух хьайи жегьил пешекардиз и уьлкве бегенмиш хьана: алакьунар авайбуруз къуллугъдин рекьяй виликди фидай мумкинвилерни ава, мажибарни екебур я.
Инал Эльвира Аливердиевадин хизандикайни, абур Сулейман-Стальский райондай Санкт-Петербург шегьердиз куьч хьуникайни куьрелди ихтилатун кутугнава. Адан буба Буба Аливердиева 1994-йисуз Санкт-Петербургда институт куьтягьна. Амма а вахтара пешедай кIвалахдай мумкинвилер жагъизвачир, гьавиляй карчивилел машгъул хьана, исятдани и рекье кIвалах давамарзава. За кьатIайвал, ам зегьметдал, ватандал гзаф рикI алай инсан я. Гьавиляй ам хайи хуьруьз мукьвал-мукьвал хъфизва. Ана адахъ чIехи майишат ава — 5 гектардин майданда ичеринни пIинийрин багъ.
Къуй чи ватанэгьлийрин вири мурадар кьилиз акъатрай!
К.Ферзалиев
