Лезги халкьдин векилар дуьньядин гьар са пипIе бажарагълувилелди, тIвар-ван, еке авторитет аваз яшамиш жезва. Абурун низамлувилиз, карчивилиз, алакьунриз зегьмет чIугвазвай идарайрин сагьибри еке къимет гузва. Россиядин къенепатан крарин министерстводин къурулушда гьакъисагъвилелди къуллугъзавай чи ватанэгьлияр-офицерар тIимил туш. Абурукай сад РФ-дин МВД-дин Тольяттидин Управленидин начальник полковник Хейрулла Мирзоевич Агьмедханов я.
Х.Агьмедханов 1962-йисан 19-октябрдиз Азербайжан Республикадин Къусар райондин Самур поселокда дидедиз хьана. 1982-йисуз Россиядин МВД-дин милициядин Елабужский махсус школа куьтягьай жегьил офицер Тольятти шегьердин Автозаводской РОВД-дин уголовный розыскдин отделдиз оперуполномоченный яз рекье туна. 1992-йисуз Самарадин госуниверситет акьалтIарай Хейруллади юриствилин пеше къачуна. 2011-йисан июлдилай ада РФ-дин МВД-дин Самарадин Управленидин полициядин начальникдин заместителвиле кIвалахна. 2015-йисан июндилай адакай МВД-дин Тольяттидин Управленидин начальникдин заместитель хьана. Гьа и йисан октябрдилай полковник Х.Агьмедханов РФ-дин МВД-дин Тольяттидин Управленидин начальниквиле тайинарна.
Хейрулла Мирзоевич Тольятти шегьерда 1985-йисалай яшамиш жезва. Анин агьали хьайи гьа сифте йикъалай ада шегьердин важиблу идарайра къуллугъна. А йисарни офицер патал акьван регьятбур хьанач. Адан гафаралди, 1980-йисар бандитрин дестеяр арадал къвезвай, 1990-йисара майдандиз акъатай банддестейри Советрин Союздин девлетар пайзавай, абур патал яракьдалди женг чIугвазвай вахтар тир.
— Шегьер пай жезвай административный пуд райондикай криминалдин жигьетдай иллаки четин гьалар авайди Автозаводдин район тир, — рикIел хкизва Х.Агьмедханова. — Полицияда къуллугъзавайди хьуниз килигна, зун гзаф вакъиайрин шагьид хьана. 1997-йисалай закай и райондин криминальный милициядин отделдин начальник хьана. Чи отдел районда арадал къвезвай чIуру крар ахтармишуниз мажбур тир. Ягъунар, кьиникьар, гранатар хъиткьинарунар бандитрин арада тIимил хьаначир. Ихьтин крари инсанрик къурхулувал кутазвай.
Самара шегьерда кIвалахзавайла, отделдиз машинрин гаражрин патав са машинда мейит ава лагьай хабар атана. Экуьнин сятдин 5-даз чкадал атай чаз машиндин кьулухъ сиденидал алай мейит акуна. Галай медикди мейитдал гъил эцигайла, ам хъиткьинна. Зи вилерин экв квахьна, медик вич-вичелай фена. Гуьгъуьнлай малум хьайивал, мейитдик гранат кутунвай кьван. И “пишкешни” Главкдин (главный комитет) руководителдиз гьазурнавайди тир. И кар авур киллерни вичин жазадив агакьнай.
Къейд авун лазим я хьи, Х.Агьмедханован важиблу къуллугъ зигьин, алакьун, махсус пешекарвал истемишзавайди я. Ада вичин буржи юлдашрин арада гьуьрмет аваз, лайихлудаказ кьилиз акъудзава.
Управленидин начальникди лагьайвал, Тольяттидин УМВД-дин коллектив кар алакьдай, пешекарвилелди кIвалахзавай чIехи десте я. Са терефдани абуруз бушвал къалурун кутугнавач. МВД-дин вилик везифаяр Президентди эцигзава. Абурукай кьилинбур агьалийрин хатасузвал, низам-къайда хуьн, экстремизмдиз, терроризмдиз, коррупциядиз акси гьерекатар тухун я.
Х.Агьмедханова къейд авурвал, эхиримжи вахтара бязи ксари ийизвай тахсиркарвилер дуьздал акъудунин дережа 12-13 процентдин хкаж хьанва. Гьа са вахтунда шегьерда регистрация авунвай тахсиркарвилерин кьадарни тIимил хьанва. И карда МВД-дин къуллугъчийриз гуьгьуьллувилелди тешкилнавай общественный дестейри, йифен патрулри еке куьмек гузва.
— Шегьердин агьалийрик наркотикар чукIуруни гзаф къалабулух кутазва, — лугьузва управленидин чIехида. — Винидихъ тIвар кьур Автозаводдин районда 400 агъзур кас яшамиш жезва. Ина машинар чуьнуьхунихъ, пиянискавилер авунихъ галаз алакъалу тахсиркарвилер гзаф ава. Центральный ва Комсомольский районра лагьайтIа, гзаф кьадар крар наркотикрихъ галаз алакъалу я. И районра законсуз наркотикар хуьзвайбуруз талукь месэла хцидаказ акъвазнава. Мукьвара чна Саратовдин агьали кьуна. Адан телефондай гьа и районра наркотикар эцигнавай 77 чка малум хьана, — лугьузва Х.Агьмедханова.
* * *
Х.Агьмедханован пешекарвал, чIехи дережадин устадвал, гьакъисагъвал “Къуллугъда тафаватлу хьунай” I, II ва III дережайрин медалралди, РФ-дин МВД-дин министрдин Гьуьрметдин грамотадалди къейдна.
МВД-дин къуллугъчийрин кIвалах четинди тирди вирида аннамишзава. Полковник Х.Агьмедханова ва адан гъилик кIвалахзавайбуру чеб Ватандин, халкьдин хатасузвал хуьнин къуллугъда уьтквемдаказ акъвазнавайди краралди субутарзава.
Гьазурайди — Земфира Бабаева
