Дагъустандин Автономиядин 100 йисан ва республикадин медениятдинни чIаларин йикъан сергьятра аваз Дербент шегьердин музей-заповедникдин “Женгинин баркаллувал” отделда, “Зун валди яшамиш жезва, зи багъри Гияр” лишандик кваз Россиядин журналистрин ва писателрин союзрин член, Дагъустандин культурадин лайихлу работник, РФ-дин культурадин работникрин профсоюздин, РФ-дин алакъадин ва массовый коммуникацийрин министерстводин, РФ-дин журналистрин Союздин, РД-дин культурадин работникрин профсоюздин гьуьрметдин грамотайрин, Вирироссиядин “КаспНИИРХ”-дин, республикадин “Къизилдин къелем”, “Къизилдин лекь”, “Шарвили” фондунин, Гь. Гьажибегован, РД-дин милли сиясатдин ва динрин крарин рекьяй министерстводин ва маса премийрин сагьиб Нариман Меликович Ибрагьимовахъ галаз шад гьалара эдебиятдин гуьруьш кьиле фена.
Музейдин залда писателдин ктабрин ва адан уьмуьрдинни яратмишунрин рекьиз талукь шикилрин выставкаяр ачухнавай. Выставкада эцигнавай 31 ктабдихъ, журналрихъ, газетрихъ галаз таниш хьайи гьар са касдиз республикада тIвар-ван, хсуси кьетIен хатI авай бажарагълу писателдин, журналистдин чIехи зегьмет ва ада акьалтзавай несилдиз тазвай ирс акуна.
Эдебиятдин межлисда шаирри, гьикаятчийри, Дербент шегьердин ва Белиж поселокдин дидед чIалан муаллимри, шегьердин медицинадин ва халкьдин яратмишунринни туризмдин колледжрин студентри, шегьердин юкьван умуми образованидин 12 ва 15-нумрайрин школайрин аялри иштиракна.
Публицистдихъ, писателдихъ галаз гуьруьш Хпежрин хуьруькай видеофильм къалурунилай ва “Куьгьне хуьрер” мани лугьунилай башламиш хьана. “Женгинин баркаллувал” музейдин къуллугъчи Гуьлпери Мирзабалаевади кIватI хьанвайбур Н. Ибрагьимован бинейрихъ, бубайрихъ, уьмуьрдин рекьерихъ галаз куьрелди танишарна. Ахпа ада гаф бажарагълу юрист, писатель, филологиядин илимрин кандидат, лезги писателрин Союздин регьбер Абил Сардараз гана. Вичин рахунра ада гуьруьшдиз атанвайбуруз Нариман Ибрагьимован яратмишунрин бегьерлувиликай лагьана.
— Нариман Ибрагьимован и йикъара пудкъанни цIуд йис тамам хьанва, — къейдна ада. — И вахтуникай лап чIехи пай ада эдебиятдин никIе цан цаз акъудна ва галатун тийижир зегьметди хъсан бегьерарни ганва. Литературадин тарихдай квадарай Хпеж Къурбан цIийи кьилелай дуьньядал ахкъудна ва кIелзавайбурув 1994-йисуз шаирдин сад лагьай кIватIал, 2006-йисуз “Техквердай хтайди” тIвар алаз монография ва 2016-йисуз “Пуд асирдин эдебиятдин пуд кукIуш” ктаб агакьарна. Ада СтIал Сулейманан ва Кьурагь районрин тарихрикай, чи баркаллу, кьегьал рухвайрини рушари (Артур Муталибов, Абас Исрафилов, Сергей Муртузалиев, Идрис Оружев, Радим Халикьов, Шамсудин Агьмедов, Къафлан Хидиров ва масабур) авур зурба крарикай, абурун гъалибвилерин ирсиникай кхьенвай ктабар чапдай акъудна.
Шаир Гъулангерека Нариман Ибрагьимова милли журналистикада, публицистикада лайихлу чка кьунвайди къейдна. — Гьа са вахтунда, — давамарна ада, — авторди вичин гьикаятдин, сатирадинни юмордин ва шииратдин эсерралди милли эдебият вилик финикни аквадай хътин пай кутазва. “Зун итим я, итим”, “Гъурбатдикай игитдизни ватан жедач”, “Худа-Верди — Буда-Верди”, “Къуьлуьн кьилер”, “РикIин кIусар”, “Ватандиз рехъ”, “Бахтунин шив”, “Зегьерлу кьисас” ктабра гьатнавай гьикаяйра, повестра, шиирра чи халкь, гьар са инсан патал важиблу месэлаяр къарагъарнава.
Чаз якъин тирвал, лезги гьикаятда сатирадиз, юмордиз къуллугъзавай авторар сад-кьвед ава. Белки, гьавиляй Н.Ибрагьимова эдебиятдин и хилек вичин пай кутунва жеди. Адан критикани, зарафатни, айгьамдин хъверни хъуьтуьлди, рикIе раб сух тийидайди, майилвал артухарзавайди, гъахълу рекьихъ элкъуьниз эвер гузвайди, жемят патал хийирлуди я, — алава хъувуна шаирди. Вичин рахунрин эхирдай Гъулангерека писателдиз бахшнавай шиир кIелна.
Дербент шегьердин 12 ва 15-нумрайрин школайра кIелзавай аялри (Герейханов Тамерлана, Гьажиев Жалила, Бабаев Рашида, Якьубова Эминади, Рустамов Тамерлана, Гусеналиева Наргиза) милли парталар алаз Нариман Ибрагьимова Ватандикай, дидедикай, тIебиатдикай кхьенвай шиирар устаддаказ хуралай кIелна.
Гуьгъуьнлай мярекатдал рахай шаир Тахмираз Имамова, писатель Гьажиагъа Мегьамедшерифова, Лезги муздрамтеатрдин литотделдин заведующий Эминат Заирбеговади, Дербент райондин кьилин библиотекадин директордин заместитель Айгуьн Мамедовади, лезги чIалан муаллимри — Муъминат Рамазановади, Регина Алиевади, Элла Муталибовади, Дербентдин педколледждин жегьилрин центрадин руководитель Луиза Гьажимегьамедовади ва гьакIни дарги, табасаран, азербайжан чIаларин муаллимри — П. Рабадановади, Н.Пашаевади, С.Исаевади, и цIарарин авторди писателдин яратмишунрикай чпин фикирар лагьана. Рукъият Къафаровади вичин дахдиз-писателдиз кхьенвай шиир кIелна. Лезги муздрамтеатрдин актриса Фатима Фейзулаевади лагьай манийри кIватI хьанвайбурун гуьгьуьлар генани цицIи авуна.
Эхирдай Нариман Ибрагьимова музейдин руководитель Алик Кьасумоваз, мярекат тешкилна вини дережада аваз кьиле тухвай музейдин пешекар Гуьлпери Шабановнадиз, чIал хуьнин рекье зегьмет чIугвазвай муаллимриз ва мярекатда иштиракай виридаз рикIин сидкьидай сагърай лагьана, аялризни мугьманриз автограф алай вичин цIийи ктабар (“Зегьерлу кьисас”, “Кьисметдин къекъуьнрал”, “Чи тIал-квал”, “Алемдин чарх”) пишкешна.
Къагьриман Ибрагьимов
