Гьамзатован “Лацу дурнайрин йикъар”, адет тирвал, машгьур шаирдин сурал, гуьмбетрал цуьквер эцигунилай башламиш хьана.
8-сентябрдин пакамахъ фад Дагъустан Республикадин Халкьдин Собранидин Председатель Хизри Шихсаидов, РД-дин Гьукуматдин Председатель Абдусамад Гьамидов, адан Сад лагьай заместитель Анатолий Къарибов, республикадин министерствойринни ведомствойрин векилар, агьалияр Расул Гьамзатован багърийрихъ галаз санал шаирдин сурал цуьквер эцигиз фена.
Урусрин драмтеатрдин вилик квай Расул Гьамзатован гуьмбетдал цуьквер эцигайдалай кьулухъ мярекатдин иштиракчияр Мегьамед Гьажиеван тIварунихъ галай куьчеда авай Ленинан комсомолдин тIварунихъ галай багъда, Азадвал гъайи аскердиз хкажнавай гуьмбетдин вилик кIватI хьана. Ина лагьайтIа, гьакъикъи сувар кьиле физвай — студентар ва школьникар, жегьил кадетар гъилера цуьквер, пайдахар аваз, жергейра акъвазнавай. Мугьманри багъда сейрзавай — ина Расул Гьамзатован жавагьиррин ван гьатнавай.
Азадвал гъайи аскердин гуьмбетдал цуьквер эцигна, Ватан патал чан гайибур рикIел хкайдалай кьулухъ микрофондихъ атай Анатолий Къарибова мярекат ачухна.
— Ибур экуь гъам — хажалатдин, эдебиятдин международный дережадин чIехи сувариз элкъвенвай Гьамзатован “Лацу дурнайрин йикъар” я, — къейдна ада ва Россиядин гзаф пипIерайни къецепатан уьлквейрай атанвай мугьманар тебрикна, икьван мугьманрин иштираквал аваз мярекатар тухун — им Расул Гьамзатован къаматдиз ийизвай еке гьуьрметдин лишан тирди лагьана.
— И кардай чи республикадиз фикир гунин, гзаф миллетрин зурба Ватандин — Россиядин халкьарин арада дуствал, садвал мягькемарунин рекье важиблу кам къачунин хъсан лишан аквазва.
“Лацу дурнайрин йикъари” неинки Дагъустандин машгьур шаирдин къаматдиз чна ийизвай еке гьуьрмет лишанламишзава, гьакIни международный терроризмдин аксина Кеферпатан Кавказдин, Россиядин вири халкьарин руьгьдин къуватар, садвал къалурзава. Им гзаф миллетрин Россиядин культурадин уьмуьрдихъ галаз сих алакъада авай Дагъустандин, Кавказдин культурадин фикир желб ийиз тазвай кьетIен вакъиа я, — лагьана ада.
Сад лагьай вице-премьер Расул Гьамзатован эсеррикай, абурун таржумайрикай, “Дурнаяр” тIвар ганвай жавагьирдикайни рахана.
— Лугьуз жеда хьи, чи ватанэгьлиди машгьур авур дурнаяр вири дуьньяда Ватан хвейибурун лишандиз элкъвенва, — алава хъувуна Анатолий Къарибова ва гаф Махачкъала шегьердин мэр Муса Мусаеваз гана.
— Расул Гьамзатован чIехивал чна ам эхиримжи рекье хутадайла, мадни гьиссна. Адан гьикаятдин, поэмайрин, шииррин ва адетдин келимайрин зурбавал чна ам кечмиш хьайидалай кьулухъ рикIел хкизва. Накь рикIелай фейи крарал къе чна къимет эцигзава. Квекай чун яргъаз хьанатIа, гьабурал къе чна чан хкизва. Чи республикадин регьбер себеб яз, медениятдин ивирар къе Ватан ва диде кIан хьунихъ галаз са дережада ава, — къейдна М. Мусаева ва махачкъалавийризни мугьманриз сувар мубаракна.
— Ингье 31 йис я Расул Гьамзатован “Лацу дурнайри” чпин эвер гунал чи фикир желб ийиз, — къейдна РД-дин писателрин Союздин правленидин председатель Мегьамед Агьмедова. — Чи девир гьикьван секинсузди хьайитIани, и суварин инсанвилин метлеб гьакьван экуьди жезва. Ам чилин шардал ислягьвилин ва Ватандиз вафалувилин дуьадиз элкъвезва…
Мярекатдал Расул Гьамзатован яратмишунрикай Россиядин писателрин Союздин сад лагьай секретарь Геннадий Иванов, Москвадай атанвай мугьман Александр Ананичев, Азербайжандин, Башкортостандин, Калмыкиядин ва уьлкведин маса регионрин писателрин тешкилатрин векилар рахана.
Гьа и йикъан нянихъ Расул Гьамзатован яратмишунрал рикI алайбур, адан багъриярни мугьманар Шииратдин театрда кIватI хьана. Абуру дагъустанви машгьур шаирдин шиирар, адаз бахшнавай хсуси эсерар кIелна, манияр тамамарна. Гьарда вич Расул Гьамзатовахъ галаз таниш хьайивал рикIел хкана. Мярекат геждалди ва чими гьалара давам хьана.
Гьамзатован “Лацу дурнайрин йикъар” — литературадин международный XXXI фестиваль Дагъустанда ЮНЕСКО-дин къаюмвилик кваз 7-10-сентябрдиз кьиле фена. Фестивалдин сергьятра аваз Махачкъалада Каспийскда, Дербентда, Буйнакскда, Гунибдани Хунзахда ва масанра элкъвей столар, конференцияр, выставкаярни суварин концертар тешкилнавай.
Эмираслан Шерифалиев
