Кьиблепатан Дагъустандин районра мугьманвиле авай чIавуз РД-дин хуьруьн майишатдин ва суьрсетдин министр Керимхан Абасов Мегьарамдхуьруьн райондизни фена. Ина эхиримжи йисара багъларин, иллаки интенсивный жуьредин багъларин, майданар хейлин гегьеншарнава. Муниципальный райондин кьил Фарид Агьмедов, райадминистрациядин кьилин сад лагьай заместитель Гьабибуллагь Мурадалиевни галаз Керимхан Абасов Оружбайрин хуьре хьана. Ина “Гранит” СПК-дин гзаф хилерин майишатдин чилерал интенсивный жуьредин багъларай ичерин бегьер кIватI хъийизва.
Райондин кьил Фарид Агьмедова суьгьбет авурвал, им районда 2013-йисуз 4 гектардин майданда кутур интенсивный жуьредин сад лагьай багъ я. Гьа идалди кар алай “Нетижалу агропромышленный комплекс” проектдин сергьятра аваз Дагъустанда багъманчивал кIвачел ахкьалдарунин барадай республикадин Кьили гайи теклифдиз къуват гана. Майишатди, марф къурунин жуьреда ятар гузвай интенсивный жуьредин багъларин майданар йисалай-суз гегьеншаруналди, райондин амай багъманчийриз чешне къалурзава. Алай вахтунда “Гранит” СПК-дин багълара кьуд сортунин ичер битмишарзава. “И майишатди интенсивный багъдин гьар са гектардай 50 тонн емишар кIватI хъийизва. Имни багъ кутур кьуд лагьай йисуз. 5-6 йис арадай фейила лагьайтIа, са гектардай 70 тонндив агакьна бегьер кIватI хъувун пландик кутунва”, — къейдна райондин кьили.
Мегьарамдхуьруьн районда багъманчивал хъсан ериш аваз вилик физвайдакай лугьун герек къвезва. 2017-йисан делилралди, районда багълари кьунвай майданар 463 гектардив агакьнава. Им Дагъустандин хуьруьн майишатдин ва суьрсетдин министерстводи хъсан нетижа яз гьисабзава.
Майишатда кIвалахар кьиле физвай гьалдихъ галаз таниш жедай чIавуз РД-дин хуьруьн майишатдин ва суьрсетдин министрди багълар дигидай бес кьадардин целди таъминарунин ва гьасилнавай хуьруьн майишатдин продукция маса гунин месэладиз итиж авуна. Идалай гъейри, районда логистикадин центраяр тешкилун чарасуз тирдини къейдна, гьикI лагьайтIа, им кьибледин хъуьтуьл гьаваяр жедай хуьруьн майишатдин район я.
Битмишарзавай салан майвайрин ва емишрин кьадар артух жезвайди фикирда кьуналди, хуьруьн майишатдин продукция хуьн ва гьялун карчияр патал менфятлу кIвалахдиз элкъведай. Керимхан Абасова къейд авурвал, республикада емишар ва салан майваяр хуьдай чкаяр эцигуниз талукь месэладай РД-дин Минсельхозпроддин пешекарри Россиядин Минсельхоздив агакьардай теклифар гьазурунин винел кIвалахзава.
Мегьарамдхуьруьн райондин администрациядин пресс-къуллугъ.
