Уьлкведин вири регионрин образованидин идарайра хьиз, Кьурагь райондин КIирийрин хуьруьн школа-интернатдани Чирвилерин югъ шад гьалара къейдна.
— Чун патал и югъ кьетIенди я, — лагьана школадин директор Тагьиров Надир Сабировича. — Чирвилерин сувар къейд авунихъ галаз сад хьиз, и югъ чи райондин вири агьалияр патал лишанлудини хьана: школа-интернат вичин тIварцIихъ галай Россиядин Федерациядин Игит Батманов Зейнудин Лукьмановичаз бюст-памятникни ачухна.
И лишанлу мярекатда Кьурагь райондин администрациядин кьил Замир Азизова, РД-дин Халкьдин Собранидин депутат Девлетхан Алиева, РД-дин Хатасузвилин Советдин секретардин заместитель Сефербег Гьамидова, Каспийск шегьердин энергосетриз регьбервал гузвай Марат Ягьяевича ва Ариф Рамазановича, Кьурагь райондин образованидин отделдин начальникдин везифаяр тамамарзавай К.Абдулхаликьова, гьуьрметлу мугьман, РД-дин халкьдин художник, памятникдин автор, скульптор Хизри Асадулаева ва масабуру иштиракна.
Хизри Гъазиевича вичин патай интернатдин школьникриз къиметлу 100 ктабни багъишна. И кардай Надир Тагьирова школадин коллективдин тIварцIихъай скульптордиз сагърай лагьана.
Суварин йикъаз талукьарнавай линейкадал рахадайла Россиядин Игитдин уьмуьрдин юлдаш Жамиля Батмановади республикадин ва райондин кьилевайбуруз Батмановрин хизандин гьакъиндай датIана къайгъударвал авунай сагърай лагьана. Гьа са вахтунда ада дуьньяда ислягьвал хвена, багърийрикай магьрум хьуникди дидейрин вилерал накъвар тахьана кIанзавайдакай лагьана.
— Чи кьегьал хциз кьиникьикай, вагьшийрикай кичIе хьанач ва ада эбедивилиз кам къачуна,- лагьана Сефербег Гьамидова.- Зейнудин Батманов гьамишалугъ чи рикIера ава. Ам акьалтзавай несилдиз ва исятда Украинада махсус серенжемда иштиракзавайбуруз руьгьдин, мягькемвилин, уьтквемвилин чешне я.
Эхь, Игитар рекьидайди туш, абур асирралди халкьдин рикIе амукьда.
Абад Азадов
