Йиф. Вири ширин ахвара ава. Амма къурушви Айдунов Айдуна, дежурный яз, вичин къуллугъдин везифаяр тамамарзава. Диде-бубадиз ахвар къвезвач, гьамиша хкведай вахтунилай алатнава. РикIерик къалабулух акатзава. Мартдин вацран 13-данни 14-дан йиф. Хаинризни къачагъриз йифен ахвар авач.
Хасавюрт райондин Батаюрт хуьре са вагьши кас тек дишегьлини пуд гъвечIи аял авай кIвализ атана, еке кьадар пул истемишзава. Къуншийризни хабар ава, амма садавайни сакIани эгечIиз жезвач. Хаиндин гъиле гранат ава. Телефондин зенг. Зур сятни жезвач, Айдунан отделение атана акъатзава. ТIалабунриз са фикирни гузвач, гъвечIи аял са гъилив кьуна, пул гъваш лугьузва. Акъвазуникай хийир авач. Белки, гьа и арада Айдуна вичин гъвечIи пуд аялдикай фикирнатIа: пенжердай фена, вагьшидин гъиле авай гранат акъудзава ва гьа и декьикьада гранат хъиткьинзава…
1993-йисан 10-июндиз Россиядин Федерациядин Президентдин къул алаз акъудай Указдалди, къуллугъдин везифаяр тамамардайла, къалурай игитвилиз килигна, Айдунов Айдун “За личное мужество” ордендиз лайихлу хьана (кьейидалай кьулухъ).
Айдунов Айдун 1962-йисан 2-январдиз Къурушрин хуьре колхоздин рабочияр тир Бухсаянни Зейнабан хизанда дидедиз хьана. 1979-йисуз школа куьтягьайдалай кьулухъ пуд йисуз Советрин Армиядин жергейра Гьуьлерин Флотда къуллугъна. Хтайла, ам къенепатан органра кIвалахал акъвазна. Чешнелу милиционер Астрахандин милициядин махсус школадиз рекье туна. Анаг агалкьунар аваз куьтягьна, лейтенантди Хасавюртдин РОВД-дин розыскдин отделда кIвалахиз башламишна. Эхиримжи нефесдалди вичин везифаяр намуслувилелди, баркалла алаз кьилиз акъудна. И кардин гьакъиндай адаз ганвай грамотайри ва маса документри шагьидвалзава.
Айдунан тIварунихъ Къурушрин хуьруьн 1-нумрадин юкьван школа, Хасавюрт шегьерда ва хуьре куьчеяр янава. Хуьруьн школадин музейда ва дегьлизда стендар ава. Айдун 33 йиса аваз игитвилелди телеф хьана. СагъзамайтIа, и йикъара ада 60 йис къейддай…
Алай вахтунда Айдун Бухсаевичан тIварунихъ галай 1-нумрадин юкьван школада адан руш Рустамова Малика Айдуновнади информационно-коммуникационный технологийрин рекьяй директордин заместителвиле кIвалахзава. Ада руш Ясминани хва Адам тербияламишзава. Айдунан муькуь руш Наида Махачкъалада социальный страхованидин фондунин къуллугъчи я. Адахъ са хва — Магьмуд ава. Дирибаш хва Айдунан тIвар чи рикIера эбеди я.
Гьажи Къазиев
