И йикъара чав, Махачкъалада, Усугъчайдал, Къаракуьреда ва масанра яшамиш жезвай Наврузоврин, Эмирсултановрин, Амирагьмедоврин хизанрив, мукьва-кьилийрив, багърийрив рикI тIардай чIулав хабар агакьна. Яргъалди чIугур залан азардикди зегьметдин ветеранар тир Сабир ва Айишат Наврузоврин хва, и йикъара вичин 61 йис тамам хьун вилив хуьзвай Эмирсултан Сабирович рагьметдиз фена. Чна адахъ яс чIугвазва, диде-бубадиз сабурар гузва.
Э.С.Наврузов 1960-йисан 24-ноябрдиз Махачкъалада къуллугъчийрин хизанда дидедиз хьана. ДГУ-дин юридический факультет куьтягьайла, ам Волгограддиз рекье туна, гьана сифте 15 йисуз прокуратурада, гуьгъуьнлайни вичин уьмуьрдин эхирдалди адвокатвиле кIвалахна.
1979-1981-йисара ада Советрин Армиядин десантдин частарихъ галаз санал Афгъанистанда интернационалиствилин буржи тамамарна. Ана къалурай кьегьалвилерай Эмирсултаназ “Аскер-Интернационалист”, “Жуьрэтлувиляй” медалар гана. Адакай армиядин “Яру гъед” ва маса газетра гегьенш макъалаяр кхьенай.
Са шумуд сеферда залан хирер хьайи Эмирсултан Сабирович Кабулдин, Чирчикдин госпиталра сагъар хъувунай.
Ислягь уьмуьрда чIехи пешекарвал къачур юристди вичи кIвалахай вири чкайра гьуьрмет, авторитет къазанмишна. Адан тIварцIихъ Волгограддин областдин прокуратурадинни адвокатурадин патай гьуьрметдинни чухсагъулдин чарар, пишкешар атана.
Эмирсултанан рикIик хъийидай гзаф крар кумай. Гьайиф, залум азарди адаз а мумкинвал ганач. Еке мурадар рикIе амаз, ам чавай гьамишалугъ яз къакъатна, эбеди дуьньядиз хъфена.
Чна рагьметлудан хизандиз, Сабир ва Айишат Наврузовриз, мукьва-кьилийриз, вири къаракуьревийриз, ярар-дустариз башсагълугъвал гузва. Эмирсултан Сабировичан экуь къамат чи рикIелай садрани алатдач.
Наврузоврин хтулар: Сарухан Гьажиев,
Агьмед Амирагьмедов ва абурун хизанар.
