И йикъара лезги театрдин (сегьнедин) искусстводин векилрив чIехи магьрумвал агакьна: яргъалди чIугур залан азардикди Дагъустандин халкьдин артист, хъсан суьгьбетчи, юмординни сатирадин къаравилийрин сагьиб, яр-дустунал рикI хьайи дуст Эдуард Маллаевич Багъишев рагьметдиз фена.
Э.Багъишев 1936-йисуз Докъузпара райондин Усугъчай хуьре дидедиз хьана. Ина юкьван школада кIелдай йисара ада жаван гьевескаррин кружокда иштиракзавай. И карди ам чIехи сегьнедални, пешекар артистрин жергедизни гъана. Мектеб акьалтIарайдалай кьулухъ Эдуарда Бакуда Азербайжандин М.А.Алиеван тIварунихъ галай театральный госинститутда чирвилер къачуна (1960-1965-йисар). Гьа йисара жегьил студентди актерди машгьур драматург Жафарлыдин “Алмас”, дуьньядин классик Ф.Шиллеран “Къачагъар” ва маса тамашайра кар алай ролар устадвилелди тамамарна.
Бакудай ам, кинодинни театрдин пешекар актер, Лезгийрин СтIал Сулейманан тIварунихъ галай госмуздрамтеатрдиз хтана. Ина адан бажарагъ мадни ачух хьана, виликди фена. Саки 60 йис ада чи милли сегьнедиз бахшна, цIудралди жуьреба-жуьре ролар тамамарна. Эдуард Маллаевича аялар патал сегьнеламишай пьесайрани хъсан къаматар арадал гъана. Хейлин кинойрани ада вич бажарагълу артист тирди субутна.
Театрдин артист хьиз, ам активный мухбирни тир, ада гьам шегьердинни райондин, гьам республикадин газетризни журналриз уьмуьрдин жуьреба-жуьре хилерай важиблу материалар кхьизвай.
“Лезги газетдин” редакцияди Э.Багъишеван зегьмет са шумудра гьуьрметдин чарар, пулдин пишкешар гуналди къейдна. Адан юмординни сатирадин къаравилийри чи газетда чпиз лайихлу чка кьазвай, кIелзавайбуруни абур хушдиз кьабулзавай.
Яратмишдай ва сегьнедин искусстводин рекье Э.Багъишеван агалкьунар адаз “Дагъустан Республикадин лайихлу артист” (1977-йис), “Дагъустандин халкьдин артист” (2016-йис) лагьай гьуьрметдин тIварар, республикадин гьукуматдин ва культурадин министерстводин гьуьрметдин грамотаяр, маса шабагьар гуналди къейдна.
Чна рагьметлудан хизандиз, мукьва-кьилийриз, ада зегьмет чIугур лезги театрдин коллективдиз, дериндай хажалат чIугунивди, башсагълугъвал гузва.
Эдуард Маллаевич Багъишеван экуь къамат чи рикIелай алатдач.
“Лезги газетдин” редакциядин коллектив.
