И мукьвара РД-дин премьер-министр Артем Здунова видеоконференциядин къайдада кIелунин цIийи йисаз талукьарнавай совещание кьиле тухвана. Анал, Роспотребнадзордин РД-да авай Управленидин ахтармишунрин нетижайрал асаслу хьана, Дагъустандин образованидин идараяр кIелунин цIийи йисаз гьазур хьунин дережадиз талукь месэлаяр веревирдна.
Малум хьайивал, къенин юкъуз республикада умуми образованидин 1460 идара кардик ква. Анра 417972 аялди кIелзава, гьа гьисабдай яз сифтегьан классра кIелзавай аялрин кьадар республикада 198 агъзурдалай гзаф я. Мектебрин са паюнилай гзаф кьадар хуьрерин чкайра ава.
Совещанидал хабар гайивал, алай йисуз мектебра капитальный ремонтдихъ галаз алакъалу месэлаяр гьялунив системный къайдада эгечIун ва идалди алай аямдин истемишунриз жаваб гудай шартIар таъминарун патал “100 мектеб” проект уьмуьрдиз кечирмишун давам жезва — и сеферда республикадин бюджетдай тир ва меценатри чара ийизвай финансрин гьисабдай чирвилер къачудай 139 идара ремонтда.
Са шумуд идаради санал кьиле тухвай кIвалахдин нетижада санитариядинни эпидемиологиядин жигьетдай истемишунриз жаваб гузвайди тестикьарнавай мектебрин кьадар 48-далай 28-дал кьван тIимиларнава.
Коронавирусдин тIугъвал чукIунихъ галаз алакъалу хаталувал гьелелиг къуватда амукьун себеб яз, муниципальный тешкилатрин руководителрал мектебрин кIвалах тешкилунин жигьетдай тапшурмишнава: классар ва кабинетар дезинфекция авун, анра гьава михьиз хуьн патал пенжерар ва ракIарар ахъайдай графикдал амал авун, мектебда кIелзавай аялрин арада сих алакъа тахьун патал чарасуз герек тир чирвилер гунин кьетIен программаяр гьазурун ва икI мад.
Идахъ галаз алакъалу яз, Артем Здунова муаллимар махсусдаказ гьазурунин кIвалах тешкилун тапшурмишнава. И кардин нетижада чирвилер гунин гьерекат СанПиН-дин вири истемишунриз жаваб гуналди тешкилиз жеда.
“Аялар мектебда жедай, абуру сейр ва кабинетра гьава михьи ийидай къайда дуьздаказ туькIуьрун лазим я. Аялриз чирвилер гунин гьерекат хатасузди хьана кIанда. Гьелбетда, им еке кIвалах я — сиве-сивди ацIанвай мектебра хатасуз къайда кардик кутун. Амма им образованидин управленидин ва Роспотребнадзордин кIвалах я”, — малумарна эхирдай премьер-министрди.
Чи мухбир
