Зун “Лезги газет” лап аял вахтарилай инихъ кIелзавай ва ара датIана кхьизвайбурукай сад я. Хуьре, кIвале газет гегьенш къатарал вахт-вахтунда агакьарун патал, ам гзафбуру кхьин патални за жуван пай кутазва. Кьериз-цIаруз жувани газетдиз кхьизва.
“Лезги газет” бязи чIехи районра, хуьрера тIимил кхьизва лагьайла, рикIиз залан жезва. Са шумуд йис идалай вилик вишелай виниз цналвийри чпин багъри газет кхьизвай. Эхиримжи вахтара и кьадар аквадайвал тIимил хьанва. Багьавиликай багьна кьазва. Багьа тахьанвай вуч ама гила? Югъ-къандавай виниз акъатзавай къиметри кесиб инсанрин гуьгьуьлар хазвайди чаз чизва… ЯтIани авай са газет кхьин тавун дуьз кар туш.
Малум тирвал, “Лезги газет” йисан къене 52 нумра акъатзава. Газет чпивай сайтдайни кIелиз жезвачни лугьузвайбурни кими туш. Ахьтинбуруз жаваб гуз кIанзава: газетдай чаз датIана лезги халкьдин ацукьун-къарагъун, яшайиш, гьал-агьвал, гуьзгуьдай хьиз, аквазва. Алай девирдиз дуьзгуьн вилерай килигдай мумкинвал гузва. Дарда гьатнавай, пакадин йикъак умуд кумачир кесибрин гуьгьуьлар ачухарзава, уьмуьрдин четинвилер алуддай рекьер-хуьлер жагъурзава… Газетди чи халкьдин девлетлу тарихдикай, чи руьгьдин хазинадикай датIана макъалаяр чапзава. Алай девирда лап хци, дерин фикир гана кIанзавай месэлаяр веревирдзава. Са гафуналди, “Лезги газетди”, кам-камуна аваз, вахтунихъ, девирдихъ галаз санал “нефес” къачузва.
Газетди вич лезги халкьдин трибуна тирди аннамишзава. Газет кхьин гьар са касдин вичин хушунин кар я, мажбурзавай касни авач. ЯтIани, лавгъа ихтилатар авун дуьз туш эхир.
И мукьвара зун гьамиша газет кхьизвай, кIелзавай, вичин 90 йис яш хьанвай Мегьамедшафи дахдин патав фена. Касдин вилер зайиф хьанва, гьайиф хьи, кIелиз хъжезмач. ЯтIани, газетдикай рахайла, ада “Лезги газет”, “Ас-салам” газетар кхьин давамарун тIалабна.
Къейд тавуна жедач, чпик гьал-агьвал квай, чарасуз газет кхьена чеб амайбуруз чешне хьана кIанзавай бязи къуллугъчийри и важиблу кIвалахда кьулухъ кьил кьазва. Умудлу я, цIинин йисуз, абуру чпи чIехи гъалатI ахъайзавайди гьиссда.
Идахъ галаз сад хьиз, заз сад-кьве теклифдални фикир желбиз кIанзава. Виликдай газетдиз критикадин макъала акъатайла, гьасятда ам райкомдин бюродал, исполкомдин заседанидал гьялдай. Тахсир квайбур жавабдарвилиз чIугвазвай. Газетда датIана “Серенжемар кьабулна”, “Чи критикадилай гуьгъуьниз”, “Райкомдин бюродал” ва маса рубрикаяр авай. Алай девирда абур вучиз амач? Заз чиз, абуруз газетда чка хьайитIа, хъсан жеда. Девирди и кар истемишзава.
Гьуьрметлу зи ватандашар, къуй багъри газетдин тираж – виниз, тIал алай месэлаярни чахъ тIимил хьурай! Къведай йис чи милли газетдин 100 йисан юбилейдинди тирди рикIелай алудмир! Къанажагълувал къалура, гьина аватIани, гьар са лезгиди кхьин лазим я чи “Лезги газет”.
Абдулашим Рамазанов,
РД-дин лайихлу муаллим,
зегьметдин ветеран, Цналрин хуьр
