Путинни Трамп телефондай рахана

18-мартдиз РФ-динни США-дин президентар саки­ 2 сятда телефондай рахана. Рахунар асул гьисабдай­ Ук­раи­нада авай гьала­рихъ, США-динни Россиядин ала­къай­­рихъ галаз ала­къалу хьана. «РИА Новости» чешмеди хабар гузвайвал, Владимир Путина энергиядин къурулушрин объектриз ягъунар кьуникай 30 юкъуз­ кьве терефни къерех хьунин фикир разивал ийиз­ жедайди яз кьабулна ва военный къуллугъчийриз талукь буйругъ га­на­­.

В. Путина вич къалмакъал ислягьвилелди арадай акъудунин терефдар тирди тестикьарна. Куьрелди лагьайтIа, рахунрин нетижада президентар ихьтин серенжемриз фикир гудай къарардал атана:

— энергокъурулушриз ягъунар кьунар акъвазаруниз талукь меслятдихъ галаз алакъалу яз Москвади малумарна хьи, Украинада гужуналди кьилиз акъудзавай мобилизациядин ва и уьлкведин военный къуватар мад сеферда яракьралди ацIурунин гьерекатар акъвазарун чарасуз я;

— къалмакъал къизгъин хъхьуниз рехъ тагунин ва   месэла сиясатдинни дипломатвилин рекьелди гьялун патал и хиле кIвалах тухунин асул шартI къецепатай военный рекьяй Киевдиз гузвай куьмек акъвазарун я;

— В. Путина къейд авурвал, Курскдин областда гьалкъада авай Украинадин аскерри чеб есирвиле вугайтIа, Россияди абурун уьмуьрриз заминвал гуда;

— регьимлувал къалурунин гьерекат яз, Москвади Киевдив залан хирер хьанвай (Россияда сагъар хъийиз­вай) ВСУ-дин 23 аскер вахкуда;

— 19-мартдиз Россиядинни Украинадин арада сада-садав 175 есир  вахкунин гьерекат кьилиз акъуддай меслятдал атана;

— Москвани Вашингтон Украинада авай къалмакъал­ къайдадик кутун патал кIвалахдай пешекаррикай ибарат десте арадал гъунин икьрардал атана;

— гележегда кьве терефдизни менфят жедайвал­ экономикадани энергетикада алакъалувилелди кIва­ла­хуниз талукь са жерге месэлаяр веревирдна.

Украина патал женг чIугвадач

Франциядин «Ватанпересар» партиядин регьбер Ф. Филипподи малумарнавайвал, Украинадиз Франциядай женг чIугвадай ксар ракъурунин жигьетдай президент Э. Макроназ авай «къаст» нагьакьанди я.

«Макрон, ваъ, чна Украина патал женг чIугвадач», — кхьенва ада соцсетда. Сиясатчидин фикирдалди, французар Украина патал женгера иштиракуниз гьазур туширдан патахъай Макрон гъавурда акьун лазим я. ГьакIни къейд авурвал, Украинадиз такьатар ахъаюналди ва къалмакъал давамаруналди французри «кIватIнавай чпин пулар чуьнуьхиз вугудач».

Филипподи идалай вилик малумарайвал, рагъ­акIи­­­дай­ патан аскерар Украинадиз ракъурунин пата­хъай­ авур ихтилатдалди Макроназ масадбур Россия­дал гьалдариз кIанзава. «Франциядин аскерар кIвале амукьун­ ва Украинадиз тефин лазим я. Французар­ ихьтин тек­лиф­риз­ рейсадвилелди акси экъечIна кIанза­вайди я», — лагьана ада.

Акьулсузвал яз гьисабзава

Волейболдин рекьяй Италиядин хкягъай коман­дадин­ тренер Х. Веласкодин фикирдалди, Россиядин командаяр вири халкьарин акъажунривай къерех авун акьулсуз гьерекат я. Идакай «Лента.ру» чешмеди хабар гузва.

«За им беябурчивилин, виже текъведай кар яз гьисабзава. Къугъвадай мумкинвал тагузвай аялрин патахъай садани къайгъу чIугвазвач», — лагьана ада.

Къейд ийин, 2022-йисан 1-мартдиз волейболдин международный федерацияди Россиядинни Белорус­сиядин вири командаяр халкьарин арада кьиле ту­хузвай­ акъажунривай къерехнай. И къарар исятдани къуватда ама.

Икьрардин шартIар

Азербайжандин МИД-дин пресс-къуллугъдин кьил А. Гьажизадеди Эрменистандихъ галаз ислягьвилин икьрардал къулар чIугунин шартIар малумарна. Адан гафар «Oxu» чешмеди раижна.

«Меслятдалди гьазурнавай ислягьвилин икьрардин текстинал къулар чIугунин кьилин шартIарикай сад Азербайжандин мулкарин битаввилелай ва аслу туширвилелай авай наразивилер арадай акъудунин макьсаддалди Эрменистандин конституцияда дегишвилер хтун я», — лагьанва ада.

Гьазурайди — К. Ферзалиев