Дагъустандин лайихлу эцигунардайди, технический илимрин кандидат, энергоинформационный илимрин международный академиядин академик, «Эцигунра жуьрэтлувилерай» ордендин сагьиб, Дагъустандин халкьдин игит Гьажи Ражабович Жабраилован тIвар ван тахьай кас неинки са Дербент шегьерда, гьакIни вири Кьиблепатан Дагъустандани бажагьат ава. Адакай ихтилат кватай чкадал ван къвезвайбур анжах хуш келимаяр я.
Алатай асирдин 80-йисарилай эгечIна Гьажи Ражабовича Дербентдин ири панелрикай яшайишдин кIвалер эцигдай комбинатдиз (ДДСК, гуьгъуьнлай — «Дагюгстрой» ОАО) регьбервал гана. ЯхцIур йисалай виниз девирда и комбинатди, са Дербентда ваъ, Дагъустандин маса шегьеррани, хуьрерани яшайишдин кIвалер, мектебар ва маса дараматар эцигна. Кьилди Дербент шегьердикай рахайтIа, къеледин кеферпатан цлалай гатIунна (куьгьне Советский, гилан — Гьейдар Алиеван куьчедилай) саки вири кьакьан гьавайрин кIвалер рагьметлу Гьажи Жабраилован регьбервилик кваз эцигнавайбур я. Идалай гъейри, шегьердин кьиблепатани цIийи кьве микрорайон авадан авуник адан пай ква.
Рагьметлу Гьажи Ражабовича вичин гьакъисагъ зегьметдалди вичиз гуьмбет эцигнава лугьуз жеда. Зи къаст инал и кьегьал хцин вири агалкьунрикай кхьин туш, и кар пешекар журналистри авунайтIа хъсан жедай. Амма рикIиз тIарзавай са кардикай кхьин тавуна жедач. Вичин вири уьмуьр халкьдин рекье серф авур, гьукуматдин патай медалриз, орденриз, гзаф маса шабагьриз лайихлу хьайи, Дербентдин са пай эцигна, аваданлу авур Гьажи Ражабович Жабраилован тIвар къадим шегьердин са куьчедиз кьванни ганвач.
Гьажи Ражабович Жабраилов — къизилдин гьарфаралди чи халкьдин тарихда кхьена кIанзавай тIварарикай сад я. Ихьтин кас рикIелай алудун дуьз туш! Дербент шегьердин администрациядин кьилевайбуру за жуван чарче къарагъарнавай месэладиз фикир гудайдак ва Дербентдин вилик къалурнавай лайихлувилер фикирда кьуна, Гьажи Ражабовичан экуь къамат эбеди ийидай къарар кьабулдайдак за умудар кутазва.
Жамидин Шагьпазов,
Дербент шегьер
