Ирандин тереф хуьда
Ислендиз РФ-дин Президент Владимир Путина Санкт-Петербургда Ирандин МИД-дин кьил Аббас Аракчидихъ галаз кьиле фейи гуьруьшдал и уьлкведин кьилин регьбер М. Хаменеидилай чар агакьнавайдакай хабар гана.
«ВикIегьвилел, аслу туширвилихъ ялунал бинеламиш хьуналди, Ирандин халкьди цIийи регьбердин гуьзчивилик кваз и четин синагърин муддат алудуник ва ислягьвал арадал хкуник за гзаф умуд кутазва», – лагьана В. Путина.
Ада алава хъувурвал, Ближний Востокда ислягьвал арадал хкун патал Россиядихъ Ирандиз куьмек гудай къаст ава. Вичин нубатда Аракчиди Тегерандин тереф хуьнай чи уьлкведин кьиле авайбуруз сагърай лагьана. Къейд авурвал, ада кьве уьлкведин арада авай алакъайриз еке къимет гузва. Дипломатди США-дихъ галаз чпи женг давамарда лагьана.
«Акси женг тухуналди, жуьрэтлувал къалуруналди, Америкадин гьужумриз жаваб гуналди, Ирандин халкьдивай ихьтин четинвилериз дурум гуз ва мидядин хура акъвазиз жезвайди вири дуьньядиз субут хьанвай делил я», – лагьана Ирандин къецепатан крарин министрди.
Мулкар къакъатда
Германиядин канцлер Ф. Мерца гьисабзавайвал, Россиядихъ галаз гележегда ислягьвилин къарар кутIунун патал Украинади бязи мулкарилай гъил къачун герек жеда. Ихьтин камари, Мерцан фикирдалди, Украина Евросоюздик экечIуниз гележегда рехъ ахъаюн мумкин я. Адан гафар «Reuters» чешмеди раижнава.
«Са чIавуз Украинади къалмакъал акъвазарунин гьакъиндай икьрардал къул чIугвада, гуьгъуьнлай Россиядихъ галаз ислягьвилин къарардални къул чIугвада. Гьа чIавалай Украинадин бязи мулкар а уьлквединбур яз амукь тавун мумкин я», – малумарна Мерца.
Трампал гзаф гьужумарзава
США-дин регьбер Д. Трампал мягькемвилелди къаравулвал авун герек жезва, гьикI хьи, ам Америкадин тарихда вичел виридалайни гзаф гьужумзавай сиясатчи я. «РИА Новости» чешмеди хабар гузвайвал, ихьтин фикир векилрин палатадин спикер М. Жонсона лагьанва.
«Адал гзаф гьужумзава… Ам гзаф эхдайди я, амма ам хуьнихъ мадни мягькемвилелди гелкъвена кIанзава», – лагьанва ада.
Къейд ийин, алатай кишдиз США-дин меркезда авай отелда гьар йисуз Лацу кIвалин корреспондентрихъ ва Америкадин администрациядин векилрихъ галаз шад гьалара тешкилзавай нянин тIуьн-хъунрин вахтунда гуьлле гайи агьвалат арадал атана. Ана авай вири, гьа жергедай яз Трампни, адан уьмуьрдин юлдашни тади гьалда хатасуз чкадиз акъудна. Яракьдай гуьлле ахъаюнай шак фейиди гьасятда кьуна. ГьакI ятIани, сирлу къуллугъдин агентрикай садал хер хьана.
Гуьгъуьнлай гьукумдарри шак физвайдан тIвар раижна. Ам Калифорниядин 31 йисан яшда авай агьали Коул Томас Аллен тир. Суддал прокурорди малумарайвал, Алленаз президент тфенгдай ягъиз кIанзавай. Адавай гьакIни тапанчи ва чукIулар вахчуна.
Къадагъа эцигнава
Россияди ВСУ-диз куьмекар гайи Евросоюздин векилар чи уьлкведиз атунал къадагъа эцигнава. Идакай «РИА Новости» чешмеди хабар гузва.
Ихтилат Украина яракьрив ацIурунин серенжемрал машгъул хьайибурукай физва. «ЕС-ди кьабулзавай гьахъсузвилин къарарриз жаваб гуналди, Россияди уьлкведиз атун къадагъа авунвайбурун сиягь артухарнава. Сиягьдик Украинадиз военный рекьяй куьмекар гайибур, РФ-дин мулкарин битаввал чIурунин рекье алахъунар ийизвайбур акатнава», – кхьенва малуматда.
Идалайни гъейри, чи уьлкведин гьукумдарри Россиядихъ галаз мидявилелди рафтарвалзавай Европадин чиновникрин ва маса деятелрин «стоп-лист» авайдалай гегьеншар хъувунва.
Ислягь агьалийрал гьужумзава
Белгороддин областда Украинадин беспилотникри гьужум авуникди пуд агьали кьена. Ислягь агьалийрикай мад пудал хирер хьанва. Идакай 28-апрелдиз анин губернатор В. Гладкова ихтилатна, хабар гузва «РИА Новости» чешмеди.
ВСУ-ди часпардив гвай регионрал саки гьар юкъуз дронар ахъайзава. Белгороддин областда 2024-йисан августдилай инихъ терроризмдиз акси серенжемрин режим кардик ква. Ана гьалар федеральный дережада кьетIенбур яз гьисабнава.
«Лезги газет»
