Россиядин виридалайни чIе­хи­ ва кар алайбурукай сад тир Сад лагьай каналда эфирдиз акъатзавай­ «Голос» проектдин 14-сезон акьалтIна. Шад жедай кар ам я хьи, манидаррин арада­ уьлкведин дережадаваз тешкилзавай и чIехи акъажунра 1-чка лезги руш Эльмира Къарахановади  кьуна.

Проектдин финалдиз кьуд кас акъатнавай. Гъалибчи, тамашачийри сесер гуналди, ачух эфирда хкязавай. Эльмиради вичин сесиналди вири уьлкве гьейранарна: адаз тамашачийрин 42,6 процентди сесер гана. Финалда ада Алексей Рыбникован «Ты меня на рассвете разбудишь» ва Александра Пахмутовадин «Нежность» манияр тамамарна.

Эльмира Къараханова кесерлу конкурсда гъалиб­ хьайидалай кьулухъ ам гьи миллетдикай ятIа тайинариз алахъай блогерар, журналистар, СМИ-яр пара­ хьана. Бязи чешмейри ам — лезги, бязибуру – азербайжан, татар, урус, чувуд… халкьарин векил я лугьуз­ кхьенвай. Эльмира Къарахановади Рос­сиядин­ мулкара къадагъа авунвай соцсетрик акатзавай «Инстаграм-да» авай вичин профилда къейднавайвал, адан буба – лезги, диде татарка я. Бубадин бинеяр Азербайжандин КцIар райондай я. Вич Сибирда 1995-йисуз дидедиз хьана, алай вахтунда хизанар Новокузнецк шегьерда яшамиш жезва. Эльми­ради гьакIни хиве кьурвал, адаз хайи лезги чIал чизвач.

Эльмира Къарахановади Мос­к­вадин консервато­риядин Акаде­ми­ческий музыкадин училище акьал­­тIарнава. Алай вахтунда ада Моск­вада «Гели­кон-опе­ра» театр­да кIва­лахзава. Адан уьмуьрдин юл­даш Дамид Посулихин Орел шегьердай, амни манидар я, Мос­квадин са театрда кIвалахзава.

Чна Эльмирадиз чIехи агалкьун рикIин сидкьидай мубаракзава ва ам яратмишунрин рекье мадни чIехи кукIушрив агакьна кIанзава.

Чи мухбир