Рахунар, нетижаяр

Швейцариядин Женевада 17-февралдиз пуд терефдин арада кьиле фейи рахунрин нетижайрикай США-дин махсус илчи Стив Уиткоффа ихтилатна. Адан гафар 18-февралдиз «РИА Новости» чешмеди раижна.

«Кьве терефни (Россия ва Украина) чпин уьлквейрин кьиле авайбурув рахунрин нетижайрикай малуматар агакьардай ва икьрар кутIунунин макьсаддалди кIвалах давамар хъувунин меслятдал атана», – кхьена С. Уиткоффа «Х» соцсетда.

Адан гафаралди, уьлквейрин арада авай къалмакъал къайдада тунин жигьетдай США-дин президент Дональд Трампа авур алахъунар метлеблубур я.

Къейд ийин, Женевада 17-февралдиз ислягьвал арадал хкунин барадай рахунрин пуд лагьай раунд башламишна. Сад лагьай юкъуз кьиле фейи рахунар, чешмейри тестикьарзавайвал, гзаф къизгъинбур хьана.

Россиядин дестедин кьиле Президент Владимир Путинан куьмекчи Владимир Мединский ава, США-дин дестедин кьиле – Стив Уиткофф ва Д.Трампан езне Жаред Кушнер, Украинадин дестедин кьиле – Владимир Зеленскийдин офисдин регьбер Кирилл Буданов.

«Economist» журналдин делилралди, Киевдин векилрин арада гьар жуьре фикирар арадал атанва. Абур кьве чкадал пай хьанва: Буданован терефдал алайбуру США-дин регьбервилик кваз тади гьалда ислягьвилин икьрар кутIунунихъ ялзава (ахпа и мумкинвал амукь тавуни­хъай кичIела), маса фикирдал алайбуру лагьайтIа, ихьтин тади серенжемар кьабул тавун герек яз гьисабзава.

18-февралдиз рахунар асул гьисабдай экономикадин месэлайрин патахъай давам хьана. И дестедик РФПИ-дин (Российский фонд прямых инвестиций) кьил Кирилл Дмитриевни ква.

Махсус серенжемдикай

РФ-дин «РагъэкъечIдай пад» кьушунрин пилот галачиз лув гудай аппаратар идара ийизвай аскерри Запорожьедин областда Украинадин са шумуд беспилотникдин вилик пад кьуна. Идакай алатай саласадиз Россиядин оборонадин министерстводи хабар гана.

Кьилди къачуртIа, чи аскерри ВСУ-дин гексакоптерар тергуникди Запорожьедин областдал ийиз кIанзавай еке гьужумдин вилик пад кьуна.

ГьакIни чи аскерри Одессадин областда энергетикадин объектар къайдадикай хкудна.

ВСУ-ди саласадиз чи уьлкведин регионрихъ ахъаяй 151 беспилотник ПВО-дин такьатралди тергна. Кьилди къачуртIа, и юкъуз самолетдин жуьредин беспилотникар ЧIулав гьуьлуьн сергьят­ра 50 кьуна ва тергна, Крымдин мулкара – 38, Азовдин гьуьлуьн винел – 29, Краснодардин крайдин мулкара – 18, Калугадин областдин мулкара – 11, Брянскдин областдин мулкара – 4, Курскдин областдин мулкара – 1. Са йикъан вилик, 16-февралдиз, ПВО-дин такьатрин куьмекдалди мидядин 76 беспилотник кьунай ва тергнай.

РФ-дин оборонадин министерстводи 16-февралдиз малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 670 самолет ва 283  вертолет, зенитный ракетайрин 650 комплекс, пилот галачиз лув гудай 114 642 аппарат, 27 726 танк ва дяведин маса машинар, РСЗО-дин 1664 машин, артиллериядин ва маса 33 313 яракь, военный махсус 54 532 автомашин тергна.

США гьазур жезва

Эгер рахунар кьиле тухунин серенжем кьилиз акъат тавуртIа, США-ди Ирандал гьужум авуниз гьазурвал аквазва. Ихьтин фикир «CNN» телеканалди раиж­нава.

Къейдзавайвал, Ирандихъ галаз рахунар кьиле тухузвай вахт мукьва жезвай чIавуз Америкадин армияди Мукьвал тир РагъэкъечIдай пата чпин къуватар артухарнава.

Са жерге чешмейри тестикьарзавайвал, Америкади Тегерандиз кичIе хьун патал къуватар артухарнава. Идалайни­ гъейри, эгер рахунар кьиле финин серенжем бегьем тахьайтIа, ягъунар кьадай мумкинвал таъминарнава.

Идалай вилик США-дин президент Дональд Трампа Ирандин режим дегишарун герек тирдакай лагьанай. Гьа са вахтунда Ирандин къецепатан крарин министр Мажид Тахт-Раванчиди малумарнай хьи, эгер Вашингтон санкцияр кьулухъ элкъуьр хъувунин месэла веревирд ийиз­ гьазур ятIа, са бязи истемишунрилай гъил къачуна, Тегеран США-дихъ галаз ядерный жигьетдай икьрардал къвез гьазур я. Ада алава хъувуна хьи, гила «туп Америкадин пата ава» ва анин гьукумдарри чпиз гьакъикъатдани икьрар кутIунуниз кIанзава лагьана успат авун лазим я.

Кубадин гьалар

США-дин президент Д.Трампа хабар гайивал, Кубадин экономикадин гьалар пис хьуниз килигна, госсекретарь Марко Рубиоди анин гьукумдаррихъ галаз рахунар кьиле тухузва.

Америкадин терефди Кубадиз чпихъ галаз икьрар кутIунуниз эвер гузва, гьикI хьи, гуманитарный жигьетдай нагьакьан гьалар арадал атунин къурхулувал ава. «Алишверишдал гьукуматдин дережада­ къадагъа ала, нафт авач, пул авач, са затIни авач», – лугьузва Лацу КIвалин регьберди.

Гаванада авай Россиядин посол Виктор Коронеллиди идалай вилик малумарнай хьи, США-дин президентди Кубадиз нафт ракъурзавайбуруз талукь яз харж кардик кутунин къарар международный ихтиярриз аксивалзавайди, кьиле гьакь тийидайди я.

«Лезги газет»