Республикадин Кьил Сергей Меликован регьбервилик кваз 17-февралдиз кьиле фейи совещанидал  жегьилриз дуьзгуьн тербия гунин ва Дагъустанда образованидинни тербиядин центраяр тешкилунин месэладиз килигна. Ада гележегдин несилар тербияламишун патал ихьтин организацийрихъ авай метлебдикай лагьана.

«Юнармейцыйри, «Зарница 2.0» про­ектдин иштиракчийри ва аялрин маса коллективри чеб Вирироссиядин дережада лап хъсандаказ къалурна. Гьавиляй абуруз чпин хсуси майданар герек я. И жуьредин объектри образованидин, военный ва ватанпересвилин хилериз талукь гзаф месэлаяр гьялда. Гьавиляй а проектар чун патал хийирлубур я», — лагьана С. Меликова.

Бажарагълу жегьилар ва аялар жагъурдай «Альтаир» центр

РД-дин эцигунрин, архитектурадин ва ЖКХ-дин министр Бахтияр Уллаева хабар гайивал, центр эцигуниз талукь яз, алимарни желбна, мадни алава ахтармишунар хъийидайвал я. Центр эцигиз хкянавай чкадин хатасузвал тайинар хъийида ва проектдизни килиг хъийида. Анжах и кIвалахар авурдалай кьулухъ икьрар кутIунда.

Сергей Меликова къейд авурвал, кьилин везифа эцигунрин хатасузвал таъминарун я. Мукьвал вахтара проект­ тайинарун лазим я. Ада хиве кьурвал­, республикада ихьтин центр, гьикI авур­тIани, эцигда.

Образованидин «Юнармия» тешкилат

РД-дин образованидин ва илимдин  министр Ягья Бучаева ихтилат авурвал­, йисан сифте кьиляй проектдин экспертизади разивилин къарар кьабулнава. Махачкъалада кIелдай кьве корпусни галай образованидин са шумуд хилез талукь объект эцигда. Адахъ спортдин майданар­, ял ядай, аскервилин рекьяй вердишвилер гудай чкаяр жеда.

Къарабудахкент районда – «Авангард» центр

Алай вахтунда фялейри эцигунар гъиле кьадай майдан гьазурзава, эцигу­нардай материалар хкизва, электроэнергиядин даяхар дегишарзава. Фикирнавайвал, центрада кIелунриз талукь жуь­реба-жуьре мярекатар, къугъунар ва акъажунар кьиле тухуда. Ина ватанпересвилин тербия гунин кIвалах тухудай тешкилатчияр, «Хатасузвилин ва ватан хуьнин дибар» тарс гудай муаллимар гьазурда.

Сергей Меликова вице-премьер Манвел Мажонцал пудратчидихъ галаз совещание кьиле тухун ва объект эцигиз гъиле кьунин вахт тайинарун тапшурмишна.

Хасавюрт районда ватанпересвилин центр

Вице-премьер Муслим Телякавова­ суьгьбет авурвал, виликан «Хважамжам»­ лагердин майданар ахтармишайла, малум хьана хьи, куьгьне эцигунар хуьнихъ метлеб авач. Гъилевай йисуз алачухрин лагерь эцигунин къарар кьабулнава. Герек тир тадаракар гьазурдай карханани тайинарнава. Гележегда ина администрациядин ва кIелдай корпус, яшайишдин кIвалер, столовой, медицинадин ва спортдин комплексар жеда. Алай аямдин технологийриз кьетIен фикир гуда. БПЛА-дин операторар, мотоциклияр, квад­роциклияр гьалдай ксар гьазурда.

«Гъилевай йисуз чна виш кас патал­ алачухрин лагерь гьазурда ва ина «Зар­ница 2.0» проектдин финалистар гьазуруниз талукь акъажунар кьиле тухуда», — лагьана вице-премьерди.

Республикадин регьберди центрадин руководитель ва администрациядин къуллугъчияр хкягъунин кардиз кьетIен фикир гана кIанзавайди рикIел гъана. Центрадин регьбер женгерин тежриба  авай ва и хилен метлеблувилин гъавурда авай кас хьана кIанда.

Мадни лагьайвал, РД-дин жегьилрин крарин рекьяй министерстводи центрадиз тIвар гун патал конкурсни малумарзава. Совещанидин эхирдай Сергей Меликова важиблу объектар вахтунда ва ер­и­дивди эцигун лазим тирдакай лагьана.

*  *  *

Гьа и юкъуз Сергей Меликов армияда къуллугъзавайбурун хизанрихъ галаз гуьруьшмиш хьана.

«За квез пак тир рамазандин варз алукьун тебрикзава. Чна женгера телеф­ хьайи игитар рикIел хуьзва, абурун гьа­къиндай дуьа ийизва. Чавай алукьзавай Ватан хуьдайбурун югъни тебрик тавуна жедач. Вучиз лагьайтIа, куьн чи чил хуьзвайбурун багърияр я. Хейлинбуру ватан патал чпин чанар къурбандна. Квез сагъвал, аваданвал, хушбахтлувал гурай», — лагьана Сергей Меликова.

Къейд ийин хьи, Дагъустанда армияда къуллугъзавайбурун багърийриз са шумуд дережадин, санлай къачурла, 27 жуьредин куьмекар гузва.

Хийир  Эмиров