Россия — США: метлеблу рахунар

18-февралдиз Эр-Риядда Россиядинни США-дин вилик-кьилик квай векилрикай ибарат дестейри кьве терефдин алакъайрин, Украинада авай гьалар пайгардик кутунин ва кьве уьлкведин регьберрин гуьруьшдиз гьазурвал акунин месэлаяр веревирдна.

Къейд ийин, Россиядин дестеда МИД-дин кьил Сергей Лавров, РФ-дин Президентдин куьмекчи­ Юрий Ушаков ва Россиядин ачух инвестицийрин фондунин кьил Кирилл Дмитриев авай, США-дин дес­теда — уьлкведин госсекретарь Марко Рубио, милли хатасузвилин рекьяй Трампан меслятчи Майк Уолтц ва махсус илчи Стив Уиткофф. Гуьруьш 4,5 сятда давам хьана.

«Ихтилат, за гьисабзавайвал, гзаф менфятлуди хьана. Чна неинки яб акална, гьакI чун сад-садан гъавурдани акьуна. Зун ахьтин фикирдал къвезва хьи, Америкадин тереф гила чи гъавурда хъсандиз акьазва», — лагьана РФ-дин къецепатан крарин министр     С. Лаврова.

Гуьруьшдин иштиракчийри авур веревирдерин нетижаяр «РИА Новости» чешмеди раижна. Кьилди къачуртIа, ингье абур:

— гуьруьшдин иштиракчияр уьлквейрин алакъаяр къайдада тунал машгъул хьана;

— гуьруьш президентрин теклифдалди кьиле фена, абур чебни кьилди гуьруьш кьиле тухунин пата­хъай икьрар хьанва;

— Москвадини Вашингтонди гьисабзавайвал, абурун итижар сад-садав кьан тийизвайла, къалмакъалдик цIай кутун ваъ, авай месэлаяр гьялун герек я;

— Россиядини США-ди геополитикадин месэлайрай меслятар авун гуьнгуьна хтуниз еке итиж авуна;

— кьве уьлкведин меркезра тадиз векилар тайинарунин ва дипломатиядиз талукь кIвалахрихъ галаз алакъалу месэла гьамишалугъ яз гьялунин икьрардал атана;

— Россиядин векилри Америкадин векилриз малумарна хьи, Украинада НАТО-дин уьлквейрин кьушунар пайда хьун Россия патал кьабулиз тежедай кар я, гьатта абур Евросоюздин лувак кваз, чарабурун ва я милли пайдахар гваз хьайитIани;

— Украинада гьалар къайдада тунин гьерекат мукьвал  вахтара  башламишда;  кьве  терефдини  рахунар кьиле тухудай дестеяр арадал гъайила, и месэладай Россиядини США-ди датIана меслятар ийида;

— къалмакъал куьтягьунин месэладал кIвалахдай векилар кьве уьлкведини тайинарда;

— Украинадин гьакъиндай США-дин махсус илчи Кит Келлога Киевдихъни Европадихъ галаз рахунар кьиле тухуда, амма Россиядихъ галаз суьгьбетар авун патал Вашингтонди кьилдин векил тайинарда;

— Москвани Вашингтон, кьве патазни хийир жедайвал, экономикадин рекьяй алакъаяр хуьн патал манийвилер арадай акъудунин икьрар хьана;

— Владимир Путинанни Дональд Трампан гуьруьш къведай гьафтеда бажагьат кьиле фида;

— Украинада авай гьалар къайдада тунин патахъай Россиядин патай рахунар кьиле тухудайбурун дестедик акатдай ксар В.Путина тайинарда.

Россиядин бязи сиясатчийри, депутатри къейдзавайвал, Саудиядин Аравияда кьиле фейи гуьруьшди къалурна хьи, Евросоюздихъ месэлаяр гьялунин жигьетдай къуват амач.

Нидерландрин, Аргентинадин журналистри ва сиясатчийри кьиле фейи гуьруьш гележегда Украинада къайда тунин бине жедай хъсан кам яз гьисабзава.

«Чинебан савкьат»

В.Зеленскийди Саудиядин Аравиядиз фин кьулухъ элкъуьрна. Гила ада аниз 10-мартдиз фин кьетI­нава. Идакай «Лента.ру» чешмеди хабар гузва. Малум хьайивал, Эр-Риядда Россиядинни США-дин арада кьиле фейи гуьруьш Зеленский патал «чинебан савкьат» хьана.

Евросоюздик — тахсир

Германиядин сиясатчи А. Вайделан фикирдалди, Европади Украинадин патахъай рахунар кьиле тухунин карда вичи-вич явашарна. Ихьтин фикир ада Россиядинни США-дин векилрин арада Украинадин патахъай жезвай рахунриз талукь яз малумарна.

«Европадин уьлквеяр США-ди кьил кутунвай рахунривай яргъа аваз хьун Европадин вичин тахсир я», — лагьана ада.

Гьазурайди — К. Ферзалиев