РД-дин Гьукуматдин Председатель Абдулмуслим Абдулмуслимовахъ галаз кьиле фейи гуьруьшдал образованидинни илимдин министр Ягья Бучаева къейд авурвал, республикадин мектебра кIелзавайбуруз алай йисуз кьетIен агалкьунрай 800 премия гана.

2025-йисуз «КIелунра кьетIен агалкьунрай» I дережадин медаль 11-класс акьалтIарай 1060 касди къачуна, II дережадин медаль — 871 касди. Дагъустан Республикадин Гьукуматдин къарардал асаслу яз, кьетIен чирвилер къалурайбуруз 100 агъзур манатдин 61 премия гана. 10 агъзур манат 718 школьникдиз гана, 5 агъзур манат — 13 школьникдиз. 100 агъзур манатдин кьадарда аваз 2 премия муаллимризни чара авуна.

Я. Бучаева, Гъалибвилин 80 йисан юбилейдин ва Ватан хуьзвайбурун йисан сергьятра аваз, образованидин хиле 630 агъзур школьникдин иштираквал авай 160 серенжем тухвайдакайни ихтилатна. Мектебра кIелзавайбуру зегьметдин тарсара окопра ишлемишдай 123920 шем ва хейлин маса затIар туькIуьрна, абур СВО кьиле физвай чкайриз рекье туна.

Чи мухбир