Давам жеда
Кремлдин векил Д. Пескова малумарайвал, государстводин хатасузвал дипломатвилин рекьелди таъминариз тахьайтIа, Россияди СВО кьиле тухун давамарда. Адан фикир журналист А. Юнашеван телеграм-каналда чапнава.
«Чи уьлкведин регьберди са шумудра малумарнай хьи, чна чи макьсадар ва хатасузвал таъминарун сиясатдинни дипломатвилин рекьелди кьилиз акъудун хъсан яз гьисабзава. Россия гьа ихьтин фикирдал алама», — лагьана Д. Пескова.
Алава хъувурвал, эгер РагъакIидай патан уьлквейрин ва Украинадин ниятар себеб яз им намумкин кар яз хьайитIа, Россияди дяведин махсус серенжем давамарда. Идаз гьич са санкциядивайни манийвал гуз жедач.
9-сентябрдиз «РИА Новости» чешмеди хабар гайивал, акси гьужум кьиле тухун патал Сумскдин областдиз акъуднавай Украинадин кьушунрин 70 процент терг хьана. Чи аскерри артиллериядин «Богдан» ва «Гвоздика» установкаяр ва Америкадин 2 бронемашин кукIварна.
Идалай вилик са жерге СМИ-ри хабар гайивал, алай йисан сифте кьилелай Украинадин яракьлу къуватрин жергейрай саки 143 агъзур кас катнава. Ихьтин малумат дезертирвилин месэлаяр веревирдзавай украинви журналистди раижна. Адан фикирдалди, 2022-йисан февралдилай ВСУ-дин жергейра къуллугъдикай 265 агъзур касди кьил къакъудна.
Украинадин кьушунри гьар юкъуз Россиядин регионрихъ беспилотникар ахъаюн давамарзава. РФ-дин оборонадин министерстводи хабар гузвайвал, 8-сентябрдин йифен сятдин 11-далай 9-сентябрдин экуьнин сятдин 7-далди ПВО-дин такьатрин куьмекдалди Украинадин самолетдин жуьредин 31 беспилотник кьуна ва тергна. Абур ЧIулав гьуьлел, Белгороддин, Курскдин, Тамбовдин, Воронеждин областрин, Крымдин, Краснодардин крайдин мулкарин туьшда цава яна.
РФ-дин оборонадин министерстводи 8-сентябрдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 666 самолет ва 283 вертолет, зенитный ракетайрин 627 комплекс, пилот галачиз лув гудай 82445 аппарат, 25004 танк ва дяведин маса машинар, РСЗО-дин 1590 машин, артиллериядин ва маса 29376 яракь, военный махсус 41319 автомашин тергна.
Меслятвал кIанзава
Россиядин Президент Владимир Путина Украинадин гьакъиндай лагьай гафарилай кьулухъ Дональд Трампа дипломатвилин алахъунар кьве сеферда артухарун герек я. Ихьтин фикир «ResponsibIe Statecraft» чешмеда кхьенва.
ШОС-дин саммитдал В. Путина малумарнай хьи, эгер акьуллу фикир гъалиб хьайитIа, къалмакъал акъвазарун патал меслятдал къвез хьун мумкин я.
«Чна умуд кутазва хьи, США-дин регьбер Д. Трампа и гафариз фикир гуда. Аляскада ада В. Путинахъ галаз кьиле тухвай гуьруьшди вилив хвейи нетижайрал гъаначтIани, Трампавай Украинада кьиле физвай женгер акъвазарунин барадай гьерекатар артухариз жеда. Амма и кар патал ада алава санкцияр кардик кутунин ва военный рекьяй Россиядиз аксивилер авунин патахъай гьараярзавайбуруз яб гана кIан жедач», — кхьенва макъалада.
Китайдиз фена хтайдалай кьулухъ нетижаяр кьуникай арбе юкъуз рахадайла, В. Путина малумарайвал, эгер В. Зеленский гуьруьшдиз гьазур ятIа, Москвадиз атурай. Гуьгъуьнлай Д. Пескова къейдна хьи, уьлкведин регьберди Киевдин режимдин кьилиз рахунар кьиле тухун патал Россиядиз теклифна, капитуляция кьабулун патал ваъ. Амма Зеленскийди Москвада гуьруьш кьиле тухуникай кьил къакъудна.
Китайдихъ галаз…
Дуьньядин гьалар пайгарсуз тир и макъамда Китайдини ЕС-ди алакъаяр мягькемарун герек я. «РИА Новости» чешмеди хабар гузвайвал, ихьтин фикир КНР-дин председатель Си Цзиньпина Португалиядин премьер-министр Луиш Монтенегрудихъ галаз гуьруьш кьиле фейи вахтунда малумарна.
«Дуьньядин гьалар гьикьван четин жезватIа, гьакьван гзаф Китайдизни ЕС-диз алакъаяр ва сада-садаз ийизвай ихтибар мягькемарун герек я», — лагьана Китайдин регьберди.
Гьазурайди — К. Ферзалиев
